Dealings & Money

(۳) سوال:میں نے ایک شخص کو 10 ہزار ریال دیے تھے اس وقت ایک ریال کی قیمت 17 روپے ہندوستانی ہوتی تھی اور 10 ہزار ریال کی رقم ایک لاکھ 70 ہزار روپے بیٹھتی تھی۔ اب ہم ان سے رقم کا مطالبہ کر رہے ہیں تو کہتے ہیں کہ ہم اس وقت کے اعتبار سے یعنی 17 روپے کے حساب سے دیں گے حالانکہ اب ریال کا ریٹ بڑھ کر تقریبا 24 روپیہ ہو چکا ہے تو ہمارے لیے کیا حکم ہے؟

جواب:اگر قرض ریال میں دیا تھا تو واپسی بھی ریال میں ہی ہو گی چاہے اس کی قیمت گھٹ گئی ہو یا بڑھ گئی ہو اور اگر رو پہ متعین کر کے دیا تھا کہ 10 ہزار کے بجائے ایک لاکھ ستر ہزار دوں گا تو پھر صرف ایک لاکھ ستر ہزار ہی لے سکتے ہیں اس سے زیادہ نہیں لے سکتے۔

(۴) سوال:وقف کے بعد واقف کو موقوفہ جگہ واپس لینے کا اختیار ہے یا نہیں؟

جواب:واضح رہے کہ وقف کرنے سے وقف کردہ چیز واقف کی ملکیت سے نکل کر اللہ تعالیٰ کی ملکیت میں آجاتی ہے، بعد ازاں واقف کو وقف سے رجوع کرنے یا وقف باطل کرکے موقوفہ چیز اپنی ملکیت میں لینے کا اختیار نہیں ہوتا، اور نہ ہی اسے وقف شدہ چیز میں مالکانہ تصرفات کاحق ہوتا ہے، لہذا بصورتِ مسؤلہ اگر وقف صحیح اور تام ہوچکا ہے، تو واقف کو مذکورہ موقوفہ جگہ واپس لینے کا اختیار نہیں ہوگا، وہ جگہ جس جہت اور مقصد کے لیے وقف کی گئی ہے اسی مقصد کے لیے استعمال کرنا ضروری ہے۔

(۱) سوال:سرکار کی جانب سے ملنے والا پیسہ جو ساٹھ سال کے بعد لوگوں کو ملتا ہے (جسے ہمارے یہاں کی زبان میں بھتہ پیسہ کہتے ہیں) کیا وہ ہر ایک کے لئے لینا جائز ہے؟

جواب:سرکار کی طرف سے ساٹھ سال سے زائد عمر کے لوگوں کو حسب شرائط جو پیسہ ملتا ہے وہ خالص امداد ہے، اگر کوئی شخص حکومت کی طرف سے جاری شدہ تمام شرائط کو صحیح صحیح پر کرتا ہو تو اس کے لیے بھتہ پیسہ لینا جائزہے ورنہ نہیں۔

(۵)سوال:میرا سیمنٹ کا کاروبار ہے، ایک سیمنٹ کی بیگ کا خریدی ریٹ 300 روپے پر بیگ ہے آج کل کمپٹیشن کی وجہ سے اکثر دوکاندار ایک نئے کسٹمر کو خرید ریٹ سے بھی کم یعنی 300 کی جگہ 290 میں نقصان میں سیل کرتے ہیں تاکہ کہ کسٹمر دوسرے کے پاس نا جائے، ایک بار کسٹمر کو بھروسہ ہو گیا تو وہ برابر سیمنٹ لے گا، اور بعد میں ریٹ اوپر نیچے ہوتا ہے، اس وقت ہم منافع کما سکتے ہیں تو کیا خرید ریٹ سے کم میں بیچنا اسلام میں جائز ہے؟

جواب:دکان دار کا اپنا کوئی مال، خرید ریٹ سے کم پر بیچنا اُس کی اپنی مرضی ومصلحت پر مبنی ہے اور جائز مصلحت کے تحت ایسا کرنے میں شرعاً کچھ مضایقہ نہیں؛ البتہ دوسرے دکان دار وں کو نقصان پہنچانے کا قصد وارادہ نہیں ہونا چاہیے، صرف گاہک بنانا یا باقی رکھنا مقصود ہو، نیز آیندہ اُس (گاہک) کے ساتھ دھوکہ دھڑی وغیرہ بھی نہ کی جائے۔

(۶) سوال:یہ ہے کہ کیا بینک کو سونا دے کر قرض لے سکتے ہیں یا نہیں؟ قرض واپس بنک کو ادا کرتے وقت بینک دی گئی رقم سے زیادہ وصول کرے گا،کیا اضافی رقم سود کی مد میں جائے گی؟

جواب:زیورات گروی رکھ کر بینک سے ایسا قرض لینا جس میں اصل قرض کے ساتھ اضافی رقم بھی وصول کی جائے، شرعاً جائز نہیں ہے۔ یہ اضافی رقم ”سود“ ہی ہے، جس کے لینے دینے پر قرآن و حدیث میں سخت وعیدیں آئی ہیں۔

(۱) سوال :سیونگ بینک اکاؤنٹ ہے اور اس پر سود آتا ہے، اور کئی دفعہ اکاؤنٹ میں بغیر اجازت کچھ چار جز لگ جاتے ہیں جس سے پیسے کٹ جاتے ہیں۔ تو کیا ہم سود کا پیسہ استعمال کر سکتے ہیں ؟

جواب:جونا جائز چارج کاٹا گیا ہے اس کے لیے شکایت کر کے واپسی کا مطالبہ کریں۔ لیکن سود کی رقم استعمال کرنا درست نہیں ۔ اسے صدقہ کرنا ضروری ہے۔

(۲) سوال:اسکول کہتا ہے: اگر بچہ اتنے نمبر لائے گا تو اتنی فیس اور اگر اتنی لائے گا تو اتنی یعنی جتنا کم نمبر، اتنی زیادہ فیس ۔ تو اس طرح شریعت میں فیس دینا اور لینا کیسا ہے؟

جواب:اسکول کے اصول وضوابط ہیں وہیں سے رابطہ کریں۔ اگر انہوں نے اصول آپ کو بتا دئے ہیں اور آپ نے ان کو مان کر ایڈمیشن کرایا ہے تو ان کے اصول کے تحت ان کالینا درست ہے۔

(۵) سوال:اگر کوئی قرض دار اپنی خوشی سے قرض واپس کرتے وقت کچھ زیادہ رقم واپس کر دے تو وہ سود میں شمار تو نہیں ہو گی ؟

جواب:اگر مقروض کے ساتھ قرض واپس کرتے وقت زیادتی کا معاہدہ نہیں ہوا تھا ، اور نہ ہی وہاں کے عرف میں یہ رواج ہے که قرض ادا کرتے وقت زیادتی کرنی پڑتی ہے، بلکہ بغیر کسی معاہدہ اور عرف کے مقروض اپنی خوشی سے زیادتی دے رہا ہے، تو اس کا لینا آپ کے لیے جائز ہے، اور مقروض کو اس پر اجر اور ثواب ملے گا ، احادیث میں اس کی ترغیب وارد ہوئی ہے، چنانچہ آپ ﷺ نے فرمایا تم میں سے بہترین شخص وہ ہے جو قرض کی ادائیگی زیادہ اچھے طریقہ سے کرنے والا ہو۔

(۱) سوال :میرا سوال یہ ہے کہ میری کرانا کی دکان ہے میری دکان سے جو سامان لیتے ہیں وہ اُدھار لیتے ہیں اور سامان۔ کا ریٹ بھی نہیں پوچھتے وہ میرے پیسے بھی 6 یا 10 مہینے میں دیتے ہیں تو کیا میں اُنکو سامان مہنگا لکھ سکتا ہوں؟

جواب:نقد کے مقابلے میں ادھار زائد قیمت پر سامان فرخت کرنا جائز ہے بشرطیکہ مجلس عقد میں عاقدین کی رضامندی سے ادھار کی ایک قیمت طے ہوجائے اور معاملہ مبہم نہ رہے اور چاہے خریدار کو مارکیٹ ریٹ یا نقد ریٹ معلوم ہو تب بھی حرج نہیں، ہاں جھوٹ بول کر یا دھوکہ دے کر بیچنا جائز نہیں۔

(۲) سوال:اگر گھوس دے کر نوکری کرتا ہے کوئی تو کیا اسے ملنے والی تنخواہ جائز ہوگی یا حرام ہوگی؟

جواب:اگر وہ اس کام کو بخوبی انجام دیتا ہے اور اپنے کام میں ماہر ہے تو تنخواہ حلال ہوگی۔ رشوت دینے کا گناہ ہوگا۔

(۵) سوال :ایک شخص نے مکان خرید اینچنے کی نیت سے لیکن خریدار نہیں ملا تو کرایہ پر دے دیا لیکن نیست بیچنے کی برقرار ہے تو اس مکان پر زکوۃ نکالنی ہوگی یا نہیں ؟

جواب:جو مکان فروخت کرنے کی نیت سے لیا جائے ، یعنی مکان خریدتے وقت یہ نیت ہو کہ مناسب دام ملنے پر اسے فروخت کر کے نفع کماؤں گا، تو اس صورت میں ایسا مکان مال تجارت شمار ہوگا ، اور مال تجارت اگر نصاب (ساڑھے باون تولہ چاندی کی قیمت ) کے برابر یا اس سے زیادہ ہو تو سال گزرنے پر اس کی زکاۃ واجب ہوتی ہے۔ اور ابھی اگر کرایہ پر دے رکھا ہے لیکن بیچنے کی نیت برقرار ہے تو کرایہ کو بھی اسی نصاب میں جوڑا جائے گا۔

(۵) سوال :ایک پٹرول پمپ والا اعلان کیا کہ میرے پاس ۰۰۳/ کا پٹرول جتنے افراد خریدینگے ان کے ناموں کو قرع میں ڈالکر جسکا نام نکلے اسکو بڑا گفٹ دیا جاے گا تو اب اس گفٹ کے اندر آنے والی چیز استعمال کرنا کیسا ہے؟

جواب:اگر پٹرول پمپ والا اس کی وجہ سے قیمت میں اضافہ نہیں کرتا ہے اور نہ ہی اس کی کوالٹی میں کمی کرتا ہے تو اس کا قرعہ اندازی کے ذریعہ گاہک کو انعام دینا اس کی طرف سے تبرع اور احسان شمار ہوگا اور گاہک (کسٹمر) کے لیے اس انعام کا لینا اور اس کا استعمال کرنا جائز ہوگا۔ ورنہ نہیں۔

(۳) سوال:کار یا بائیک کا انسورینش کرانا کیسا ہے؟

جواب:اگر کسی ملک میں گاڑی سڑک پر لانے کے لیے گاڑی کا انشورنس کرانا قانونی طور پر لازم وضروری ہوتو گاڑی کا انشورنس کراناجائز ہوگا۔

(۲) سوال:جو پلاٹ اس نیت سے خریدا ہو کہ اس میں رہ بھی سکتے ہیں اور کرایہ پر بھی دے سکتے ہیں پھر اسکو کرایہ پر دیدیا اب اس پلاٹ کی اصل قیمت میں زکوٰۃ ہوگی یا اس ملنے والے کرایہ پر زکوٰۃ واجب ہوگی؟

جواب:پلاٹ پر زکاۃ صرف اس صورت میں واجب ہوتی ہے کہ جب یہ پلاٹ تجارت کی نیت سے خریدے جائیں، یعنی اسی پلاٹ کو بیچنے کی نیت ہو یا اس پر مکان یا فلیٹ بناکر بیچنے کی نیت ہو۔ اگر اس پر مکان بنا کر اسے کرایہ پر دینے کا ارادہ ہو تو ایسے پلاٹ پر زکاۃ لازم نہیں ہے۔ لہذا اس صورت میں کرایہ کی رقم نصاب میں ملنے کے بعد اگر صاحب نصاب ہوجاتا ہے تو اس پر زکوۃ واجب ہوگی۔

(۲) سوال:كیا والد كے انتقال كے بعد والدہ والد كے مكان كی مالك بن جاتی ہیں؟

جواب:اگر والد صاحب نے اپنی ملکیتی مکان کو حالت حیات میں ہی والدہ كو قبضہ دیكر مالك بنا دیا تھا تو وہ مكان والدہ كی ملكیت شمار ہوگا اور والد كی طرف سے وہ ہبہ (گفٹ) سمجھا جائے گا۔ اور اگر والد نے یہ كہا تھا كہ  میرے مرنے کے بعد  یہ مکان والدہ کا ہوگاتو شرعاً یہ ”وصیت“ ہے، اور کسی وارث کے لیے وصیت کے معتبر ہونے کے لیے یہ ضروری ہے کہ وصیت کرنے والے کے انتقال کے بعد تمام عاقل ، بالغ  ورثاء اس وصیت کو  نافذ کرنے پر  خوش دلی سے راضی ہوں، تمام عاقل بالغ ورثاء کی اجازت کے بغیر  وارث کے لیے وصیت نافذ نہیں ہوتی بلکہ کالعدم ہوجاتی ہے۔

اور اگر سائل کے والد کے انتقال کے بعد تمام عاقل بالغ ورثاء  نے والد کی وصیت کو نافذ کرنے کی اجازت نہیں دی  تو ایسی صورت میں مذکورہ مکان  والد کا ترکہ  ہے جو  ان کے تمام شرعی ورثاء میں شرعی حصص کے مطابق تقسیم ہوگا۔

(۴) سوال:کسی کی زمین بیچنے میں کمیشن لینا کیسا ہے؟

جواب:اگر مذکورہ شخص بائع اور مشتری میں سے کسی کاوکیل نہیں ہے، اور اس نے بائع اور مشتری کو آپس میں ملایا اور ان کے درمیان  واسطے کا کردار ادا کیا، باقی معاملہ (عقد) بائع اور مشتری نے آپس میں خود کیا تو ایجنٹ کے لیے بائع اور مشتری دونوں سے (یعنی جانبین سے) رابطہ کرانے کا متعینہ کمیشن لینا جائز ہے، تاہم اگر ایجنٹ ان دونوں میں سے کسی ایک کی طرف سے وکیل بن کر معاملہ کرتا ہے تو پھر جس کے جانب سے وکیل ہے صرف اسی سے کمیشن لینا جائز ہے، دوسرے سے کمیشن لینا جائز نہیں ہے، کیوں کہ اگر سامان بائع خود نہ بیچے، بلکہ کمیشن ایجنٹ اس کی طرف سے وکیل بن کر سامان فروخت کرے تو ایسی صورت میں کمیشن ایجنٹ ’’عاقد‘‘ بن جائے گا، اور عاقد اس شخص  سے کمیشن نہیں لے سکتا جس سے وہ عقد کررہا ہو؛ کیوں کہ وہ اس کو کوئی اضافی خدمت فراہم نہیں کررہا، صرف سامان بیچ رہا ہے، لہٰذا اس صورت میں وہ مشتری سے صرف سامان کی قیمت وصول کرنے کا حق دار ہے، کمیشن کا حق دار نہیں۔

(۵) سوال:بلی کا پالنا اور خریدنا ، بیچنا جائز ہے یا ناجائز؟

جواب:بلی پالنا جائزہے،نیزبلی فروخت کرنا بھی جائز ہے، شرط یہ ہے کہ اسے تکلیف نہ دی جائے ،اور اس کے کھاناپانی کاخیال رکھاجائے۔

(۱) سوال:زید نے کاروبار میں نقصان ہونے کی وجہ سے سود پر قرض لیا لیکن کاروبار اس سے بھی ٹھیک نہیں ہوا نتیجہ یہ ہوا کہ اس پر بہت زیادہ سودی قرض ہوگیا۔ تو کیا زید کا سودی قرض اتارنے میں زکاۃ کی رقم سے مدد کی جاسکتی ہے؟

جواب:زید کا سود پر قرض لینا شرعا جائز نہیں تھا،تاہم اگر زید کا قرض اس کے سازوسامان سے کا فی زیادہ ہے اور وہ سید/ عباسی بھی نہیں ہے،تو وہ شرعا زکاۃ کا مستحق ہے،بقدر ضرورت زکوۃ لے کر اس کو جس قرض (سودی/بلاسودی)میں چاہے صرف کرے۔سود سے چھٹکارا دلانے کے لیے مستحق شخص کو زکاۃ دی جاسکتی۔

(۳) سوال:ایک شخص نے بینک سے پچاس لاکھ کا لون لیا ہے ہر تین مہینے میں 50,000 کی قسط جمع کرنی ہے۔ پوچھنا یہ ہے کہ یہ شخص جب زکوۃ ادا کرے گا تو کیا یہ قرض اپنے سرمایہ سے منہا کرے گا یا نہیں؟

جواب:اس صورت میں اس کے مال سے قرض کی مقدار نکالنے کے بعد، اگر بقدر نصاب مالیت بچتی ہے، تو اس بچت پر زکوۃ واجب ہوگی، چاہے قرض ادا کرے یا نہ کرے، البتہ اگر قرض کی مقدار نکالنے کے بعد نصاب کے برابر مالیت نہیں بچتی، تو اس پر زکوۃ واجب نہیں ہے۔

(۶) سوال:غیر مسلم سے تحفہ میں ملی ہوئی رقم کا مصرف کیا ہے؟

جواب:غیر مسلم کا تحفہ قبول کرنا اور استعمال کرنا جائز ہے، الا یہ کہ ایسی کوئی بات معلوم ہو جائے جو مسلم کے لئے جائز نہ ہو۔

سوال:مال میں نفع کس حد تک جائز ہے، کیا ایک روپئے کی چیز سو روپئے کی بیچ سکتے ہیں؟

جواب:شریعتِ مطہرہ نے منافع کی کوئی حد مقرر نہیں کی ہے بلکہ اس کو بازار کے اتار چڑھاؤ پر چھوڑدیا؛البتہ جھوٹ دھوکہ دہی سے بچنے کی ترغیب دی ہے؛لہذا عاقدین اگر جھوٹ ودھوکہ دہی سے بچتے ہوئے باہمی رضامندی سے کسی بھی قیمت پر معاملہ کرلیں تو اس کی گنجائش ہوگی خواہ اس میں کتنا ہی نفع ہو؛البتہ اس قدر نفع لینے کو فقہاء نے نامناسب اور خلافِ مروت کہا ہے جو غبنِ فاحش کے دائرے میں آتا ہو اور غبن فاحش یہ ہے کہ بازار میں جو زائد سے زائد قیمت چل رہی ہو اس سے زائد نفع لیا جائے، اسی کو فقہاء نے ’’مالایدخل تحت تقویم المقومین‘‘ سے تعبیر کیا ہے،یعنی ایک چیز کی قیمت کا اندازہ کئی ماہر لوگ لگائیں اور کسی کا تخمینہ اس حد تک نہ پہنچے۔

سوال:کیا سود سے حاصل شدہ رقم انکم ٹیکس اور جی ایس ٹی میں دیے سکتے ہیں؟

جواب:جی ہاں! اگر سود سرکاری بینک یا حکومتی ادارسے سے حاصل ہوا ہو تو سود کی رقم کو جی، ایس، ٹی GSTاور انکم ٹیکس میں دینے کی گنجائش ہے۔

سوال:بینک سے ملی ہوئی سود کی رقم کو کسی غریب، مجبور کو جو کہ بہت زیادہ ضرورت مند ہو اس کو دنیا کیسا ہے؟

جواب:سودی رقم کا لین دین کرنا، یا اُس کا معاہدہ وغیرہ کرنا سب ناجائز ہے، اس لیے اولاً تو سودی رقم وصول ہی نہ کی جائے، اور اگر وصول کرلی گئی ہے تو جس سے وصول کی گئی ہے اسے واپس کردی جائے، اور اگر واپس کرنا مشکل یا ناممکن ہوتو اُس سودی رقم کو کسی غریب شخص کو ثواب کی نیت کے بغیر ہی دینا واجب ہے، اپنے استعمال میں لانا یا ثواب کی نیت سے کہیں صدقہ وغیرہ کرنا درست نہیں ہے۔

(۴) سوال:حضرت ایک مسئلہ درپیش ہے، مسئلہ یہ ہے کہ ایک آدمی روپئے ٹرانسفر کا کام کرتا ہے اور ہر ہزار(1000) روپے پر دس (10) روپے چارج لیتا ہے ۔مثلاً اگر میں نے دو ہزار روپئے اپنے اکاؤنٹ میں ڈلوائے تو اسے مجھے دو ہزار بیس روپے دینے ہونگے، کیا یہ صورت جائز ہے؟

جواب:پیسے ٹرانسفر کرنے والا اگر اس کام کے پیچھے محنت اور وقت صرف کرے اور وہ اجیر بن کر اپنے عمل کی طے شدہ اجرت وصول کرے تویہ معاملہ منی آرڈر کے حکم میں ہو کر مقررہ چارج لینے کی گنجائش ہوگی لیکن اگر قانوناً یہ کام ممنوع ہوتو اس سے بچنا چاہئے۔

(۱) سوال:بغیر اجازت کے کسی کاوائی فائی استعمال کرنا کیسا ہے ؟

جواب :کسی دوسرے شخص کا وائی فائی اس کی اجازت کے بغیر استعال کر ناشر عًاناجائز ہے۔ جتنا استعمال کر چكے ہیں اس پر صدق دل سے توبہ کرے اور آئندہ کے لئے اس طرح استعمال کرنے سے بچے تاہم اس کا زمان لازم نہیں ۔

سوال:بینک کا سودی رقم بائیک کا فائن ادا کرنے کے لئے کیا استعمال کر سکتے ہیں؟

جواب:سود کی رقم ٹریفک چالان یا جرمانہ کی ادائیگی میں خرچ نہیں کی جاسکتی ، اس رقم کو غرباء ومساکین مستحقین زکاۃ پر بلانیت ثواب صدقہ کرنا واجب ہے۔ ہیلمیٹ وغیرہ پہنے کا قانون کوئی ظالمانہ قانون نہیں ہے بلکہ یہ مفید اور خیر خواہی پر مبنی قانون ہے ، لہذا جہاں تک ہو سکے اس کی پاسداری کرنا چاہیے۔ اور اگر خلاف ورزی پر کبھی چالان اور جرمانہ لگ جائے تو جرمانہ کی رقم حلال مال سے ادا کرنا چاہیے، اس لیے کہ یہاں سودی رقم دینا گویا سودی رقم کا ذاتی فائدے میں استعمال کرنا ہے۔ لہذا چالان میں سودی رقم دینا جائز نہیں ہے۔ اور اگر کسی نے چالان میں سودی رقم ادا کر دی تو اس پر اتنی رقم مذکورہ بالا سودی رقم کے مصارف میں خرچ کرنا واجب ہوگا۔

سوال :پولیس تھانہ میں جو گاڑیوں کی نیلامی ہوتی ہے کیا ان کا خریدنے کی گنجائش ہے؟

جواب:واضح رہے کہ حکومت مختلف وجوہات اور قانونی خلاف ورزیوں کی بنا پر جوگا ڑیاں ضبط کرتی ہے اور اسے جرمانہ کے طور پر اپنی تحویل میں لیتی ہے، یہ شرعا جائز نہیں ہے؛ اس لیے کہ یہ مالی جرمانہ ہے، اور مالی جرمانہ لاگو کرنا شر عًا صحیح نہیں ہے، البتہ حکومت جائز قانون کی خلاف ورزی کرنے والے کو دیگر سزا دے سکتی ہے لہذا اگر حکومت ایسا مال فروخت یا نیلام کرے تو معلوم ہونے کی صورت میں ایسا مال خریدنا اور بولی میں حصہ لینا جائز نہیں ہے؛ اس لیے کہ ملک غیر ہونے کی وجہ سے اس کا خریدنا اور استعمال کرنا حرام ہے۔

سوال:حضرت میرا ایک سوال تھا کہ کوئی بندہ سرکاری نوکری کرتا ہے وہ بندہ اپنی تنخواہ سے والدین کو حج کر اسکتا ہے؟

جواب:نوکری کے اوپر ہے۔ اگر نوکری حلال ہے۔ تو اس کی آمدنی بھی حلال ہوگی۔ سو اس سے حج و زکوۃ وغیرہ مالی عبادات وغیرہ درست ہوگی۔ ہاں۔ بینک کی نوکری بالخصوص جبکہ لکھنے و کتابت کی ہونا جائز ہے۔

سوال:کیا فرماتے ہیں مفتیان کرام اس مسئلہ کے بارے میں کوئی شخص کسی شخص کی دوکان میں اپنی رقم لگائے اور اس دوکان والے سے روزانہ سات سو روپے لے تو کیا ایسا کرنا ٹھیک ہے؟

جواب:مشارکت ہو یا مضاربت نفع متعین ہونے کی صورت میں معاملہ نا جائز ہوگا۔ کیونکہ یہ بالعموم مفضی الی النزاع اور حق تلفی کا باعث ہے۔ اس کے بجائے نفع فیصد کے اعتبار سے متعین کر سکتے ہیں۔

(۲) سوال:سود خور کا پیسہ بھی مسجد کے لیے استعمال کرنا جائزہے کیا؟

جواب:سود خور اگر سود کی رقم مسجد کو دے تو اس کا لینا اور مسجد میں ا ستعمال کرنا جائز نہ ہوگا؛ البتہ اگر حلال رقم مسجد کو دے تو استعمال کرنا درست ہوگا۔ رقم مخلوط ہونے کی صورت میں بھی احتراز کرنا بہتر ہوگا۔

(۳) سوال:کیا میری حیات میں ہی اولاد حصہ لینے کی حقدار ہے؟ اور فرمانبرداری اور نافرمانی کی بنیاد پر کسی کو کم کسی کو زیادہ اور کسی کو بے دخل کر سکتے ہیں؟

جواب:حیات میں اولاد کا ان کی جائیداد میں کوئی مالکانہ حق اور حصہ نہیں ہوتا۔ تاہم جائیداد کا مالک خوشی و رضامندی سے اولاد کے درمیان تقسیم کرنا چاہے تو کرسکتا ہے۔ اور زندگی میں اولاد کو جو کچھ دیا جاتا ہے، وہ ہبہ ہوتا ہے میراث نہیں، اولاد کے درمیان ہبہ میں مساوات (برابری) سے کام لینا مستحب ہے؛ البتہ اگر کوئی اولاد زیادہ ضرورت مندہے یا والدین کی زیادہ خدمت کرتی ہے یا اور کوئی وجہ ترجیح موجود ہے تووہ اسے نسبۃً کچھ زیادہ بھی دے سکتے ہیں، شرعاً اس میں کوئی حرج نہیں ہے؛ لیکن اولاد کے درمیان تقسیم کے بعد ہر ایک اولاد کو اس کے حصے پر قبضہ و دخل بھی ضرور دے دینا چاہئے، ورنہ بچے اس کے شرعاً مالک نہ ہوں گے۔ اور وفات کے بعد میراث کے احکام جاری ہوں گے۔ اور ہبہ سے کسی ایک کو بے دخل کرکے محروم کردینا یہ عدل و مساوات کے خلاف ہے ایسا نہیں کرنا چاہئے۔

(۴) سوال:میرے ایک دوست نے میری گاڑی کسی کام کی وجہ سے ایک دو دن کے لیے لی تھی،اس نے گاڑی بازار میں نوپارکنگ میں کھڑی کی،حالانکہ وہاں پارکنگ کی جگہ موجود تھی،جب وہ واپس آیا تو گاڑی نہیں تھی،معلوم کرنے پر پتہ چلا کہ چوری ہو گئی ہے تو اب کون ذمہ دار ہوگا؟

جواب :آپ کے دوست نے گاڑی چونکہ استعمال کے لیے عاریۃًلی تھی،اس لیے وہ اس کے پاس امانت تھی اور امانت کی حفاظت میں کوتاہی کرنے کی صورت میں امانت دار نقصان کا ذمہ دار ہوتا ہے،چونکہ صورت مذکورہ میں پارکنگ میں جگہ ہوتے ہوئے نو پارکنگ میں گاڑی کھڑی کرنا آپ کے دوست کی لا پروائی اور غفلت ہے، اس لیے اس غفلت کی وجہ سے وہ گاڑی کی بازاری قیمت کاضامن(ذمہ دار) ہوگا۔

سوال:کمپیوٹر یا لیپ ٹاپ میں کچھ سافٹ ویر کی ضرورت ہوتی ہے جس کا لائیسنس ہزاروں رو پیہ میں آتا ہے ساتھ ہی اس کی پائریٹیڈ pirated کا پی انٹرنیٹ پرمل جاتی ہے جسے لوگ فری میں استعمال کرتے ہیں اس طرح pirated سافٹ ویر کا استعمال کرنا کیسا ہے؟

جواب:پائیریٹڈ ونڈوز یا سافٹ وئیر کی سی ڈیز خرید کر استعمال کرنا اگر چہ شرعاً حرام یا نا جائز تو نہیں لیکن احتیاط کے خلاف ہے۔ جو سافٹ وئیر باقاعدہ ٹرائل ایگریمنٹ پر ڈاؤن لوڈ یا خریدا گیا ہو، اس کے بعد اس کے لیے کریک استعمال کر کے اس کو خریدا ہوا ظاہر کرنا معاہدے کی خلاف ورزی اور دھوکہ دہی پر مبنی ہونے کی وجہ سے نا جائز ہے۔

سوال:میں کرکٹ کھیلتا ہوں لیکن کچھ دوست ہیں جو میچ پہ پیسے لگاتے ہیں کہ جو جیتے گا اسے وہ پیسے ملیں گے یعنی انعام کے طور پر کیا یہ کرنا ٹھیک ہے یا نہیں؟ اگر پیسے نہ ہوں تو کھیلتے نہیں لیکن میرا دل کھیلنے کو بہت چاہتا ہے۔ بس آپ سے پوچھنا ہے کہ کیا کھیلنا چاہئے؟

جواب:میچ اس شرط پر کھیلنا کہ فریقین میں سے جوگیم ہار جائیگی وہ جیتنے والی ٹیم کو انعام دے گی صحیح نہیں ہے، یہ جوا ہے۔

سوال :دکان والے کے یہاں گراہک آتے ہیں اور کچھ ایسے ہوتے ہیں جن کے بارے میں یہ پتہ ہو یا شبہ ہو کہ ان کی آمدنی حرام مال سے ہے تو کیا دکان والے کو پیسہ لے کر سامان دینا چاہئے؟

جواب:جن لوگوں کی آمدنی کابالکل حرام خالص ہونا معلوم ہو ان کوکوئی چیز فروخت کرنا اور اس مال حرام میں سے قیمت لینا جائز نہیں۔ البتہ جن لوگوں کی کمائی مشتبہ ہو یا حلال و حرام سے ملی ہوئی ہو اور حلال غالب ہوان کے ہاتھ کوئی چیز فروخت کرنا جائز ہے؟ کیونکہ مالی معاملات میں امام کرخی رحمہ اللہ کے قول پر گنجائش ہے: بہ شرطیکہ وہ حرام مال کی صراحت کے ساتھ اسے متعین کر کے نہ دے؛ لہذا کل یا اکثر آمدنی حرام والوں سے اپنے سامان کی قیمت لے سکتے ہیں، گنجائش ہے۔ اور اگر کوئی شخص ذاتی طور پر احتراز کرے تو اس کے افضل وبہتر ہونے میں کچھ شبہ نہیں۔

سوال:میں ایک جگہ پھنس گیا ہوں وہ شخص پیسے دینے میں بہت تاخیر کر رہا ہے، میرے پاس کا غذات موجود ہیں جس کے ذریعہ میں قانونی کاروائی کر سکتا ہوں، کیا ایسا کرنا شریعت کی روشنی میں صحیح ہوگا ؟

جواب:جس نے لوگوں کو قرض دے رکھا ہو اور لوگ خوشحال ہونے کے باوجود بھی اگر اس کا قرض واپس نہ کریں تو وہ دو صورتیں اپنائے۔ پہلے وہ با اثر افراد کے ذریعے ان سے بات چیت کرے تا کہ وہ اس کی رقم واپس کر دیں اگر پھر بھی مسئلہ حل نہ ہو تو ایسی صورت میں قرض دینے والا شرعی حدود میں رہتے ہوئے مدیون سے اپنے قرض کا مطالبہ کر سکتا ہے، متعلقہ قانونی اداروں سے معاونت حاصل کر سکتا ہے۔ عدالت سے رجوع کر سکتا ہے۔ اگر مطالبے اور کوشش کے باوجود قرض دینے والے کو اپنا حق نہ مل رہا ہو تو زبردستی یا مقروض کی امانت سے اپنا حق وصول کرنے کی بھی شرعاً اجازت ہے، لیکن اس بات کا خیال رہے کہ اپنے حق سے زیادہ وصول نہ کرلے، ور نہ سخت گناہ گار ہوگا۔

(۱) سوال:ایک صاحب کویت میں سروس کرتے ہیں انہوں نے وہاں ایک دوست سے قرض لیا، اور جس دوست سے قرضہ لیا وہ بھی دوسرے ملک کا تھا۔ جب قرض دینے والا دوست ملک واپس جارہا تھا تو اس نے پیسے مانگے لیکن قرض لینے والے کے پاس پیسے نہ ہونے کی وجہ سے بعد میں دینے کو کہہ دیا۔ لیکن قرض دینے والے کا اپنے ملک میں جاکر انتقال ہوگیا۔ تو اس قرض کا کیا ہوگا؟

جواب:۔  اگر کسی نے قرض خواہ قرض ادا نہیں کیا اور اس کا انتقال ہوگیا تو اس کے ورثاء کو تلاش کرکے انہیں وہ رقم ادا کردینے سے آپ بری الذمہ ہوجائیں گے اور اگر ورثہ بھی نہ ملیں تو اس رقم کا حکم یہ ہے ثواب کی نیت کے بغیر کسی مستحق زکوۃ شخص کو دے دیں۔ ایسا کرنے سے آپ حق سے بری الذمہ ہوجائیں گے۔