Purity

(۲) سوال:کیا وہ لڑکی جو ناپاکی کی حالت میں ہو کسی رومال کے ذریعہ قرآن پکڑسکتی ہے جب کہ قرآن پر پلاسٹک کی جلد بھی ہو؟

الجواب وباللہ التوفیق:حیض و نفاس کے ایام میں قرآن کریم کو غلاف کے بغیر ہاتھ لگانا جائز نہیں ہے۔ غلاف سے مراد کسی کپڑے سے چھونا ہے نہ کہ وہ غلاف قرآن پر چڑھا ہوتا مثلاً جزدان وغیرہ (کتاب المسائل ۲۲۲)

(۳) سوال:آنکھ سے بہنے والے صاف پانی کے بارے میں بتائیے جیسے دھوپ کی تپش سے یا پیاز کاٹنے سے، یا جمائی لینے سے، کبھی کھانسی کی وجہ سے سرمہ لگانے سے، یا آنکھ میں چوٹ لگنے سے جو صاف پانی نکلتا ہے تو کیا اس پانی کے نکلنے سے وضو ٹوٹ جاتا ہے؟

جواب:تیز روشنی، دھوپ کی تپش، پیاز کاٹنے ، جمائی آنے ، کھانسی آنے ، سرمہ کی تیزی، یا سلائی آنکھ پر لگ جانے کی وجہ سے آنکھ سے نکلنے والے پانی سے وضو نہیں ٹوٹتا۔

(۴) سوال:غسل کے بعد یا مکمل برہنہ ہونے سے یا کپڑے بدلتے وقت جسم کا چھپا ہوا حصہ کھل جاتا ہے تو کیا اس سے وضوٹوٹ جاتا ہے؟

جواب:بدن کا چھپا ہوا حصہ کھل جانے یا مکمل برہنہ ہو جانے سے وضو نہیں ٹوٹتا عوام میں ننگے بدن کو دیکھ کر وضو ٹوٹنے کی بات جو مشہور ہے وہ محض غلط ہے۔

(۵) سوال:کچھ لوگ غسل خانہ میں ہی پیشاب کر دیتے ہیں بلکہ بچے تو اکثر کرتے ہیں اس کا کیا حکم ہے؟

جواب:غسل خانہ اگر کچا ہے اور اس میں پانی جمع ہو جاتا ہے تو وہاں پیشاب کرنا مکروہ تحریمی ہے، احادیث طیبہ میں اسے نسیان اور وساوس کا سبب بتایا گیا ہے۔

(۱) سوال:یا خاص دنوں (ایام حیض) میں عورت کے لیے (تسبیحا ت) ذکر اللہ کرنا جائز ہے؟

جواب:جی ہاں! ایام حیض میں عورت کے لیے تسبیحات و ذکر اللہ جائز ہے۔

(۴) سوال:پوچھنا یہ تھا کے حدیث میں کامل وضو کا تذکرہ آیا ہے کیا کامل وضو کے لیے مسواک شرط ہے؟ بغیر مسواک کے بھی کیا وضو کامل ہو سکتا ہے؟

جواب:حدیث میں ” کامل وضو کے لیے مسواک شرط نہیں ہے، لیکن یہ سنت مؤکدہ ہے، جیسا کہ نبی ﷺ کی عادت رہی ہے۔ بغیر مسواک وضو درست ہے اگر باقی فرض اور سنتیں ادا کی جائیں۔ مسواک کے بغیر وضو کو ناقص تو کہہ سکتے ہیں ؟ مگر باطل نہیں ۔

(۳) سوال:فرش پر بچھی ہوئی قالین جو فرش کے ساتھ کیمیکل کے ذریعہ چپکا دی جاتی ہے، جس کا اکھاڑ نا دشوار ہوتا ہے، اگر کسی نے اس پر پیشاب کر دیا تو اس کے پاک کرنے کا طریقہ کیا ہے؟

جواب:اگر قالین کو ہٹانا ممکن نہ ہو تو ناپاک جگہ کو اچھی طرح دھویا جائے اور پھر اس پر پانی ڈال کر پاک کیا جائے۔ یہ عمل اس وقت تک دہرایا جائے جب تک کہ ناپاکی دور نہ ہو جائے اور ناپاکی دور ہونے کا پختہ یقین نہ ہو جائے ۔

(۵) سوال :مفتی صاحب پنچ سورہ بغیر وضوء کے پڑھ سکتے ہیں؟

جواب:بغیر وضوء پڑھ تو سکتے ہیں، لیکن قرآن کے کسی حصہ یا پارے یا پنج سورہ وغیرہ کو بغیر وضوء اور طہارت کے چھونا جائز نہیں ہے۔

(۳) سوال :ایک مسلمان ہے جنکا ختنہ نہیں ہوا ہے جبکہ وہ عمر دراز ہیں۔ تو کیا ایسے شخص کا ختنہ ضروری ہے؟ کیا ایسے مسلمان سے نکاح کیا جاسکتا ہے یا نہیں؟

جواب:ختنہ بالغ ہونے سے پہلے پہلے کرالینا چاہئے، اب اگر سہولت سے ختنہ کرانا ممکن ہو تو ختنہ چھوڑنا درست نہیں، بلکہ اس کے لیے اگر ستر کھولنا پڑے تو بھی جائز ہے۔ البتہ اگر ناقابل برداشت تکلیف کا اندیشہ ہو، اور ماہر، دین دار ڈاکٹر اس کی تصدیق کرے تو نہ کروایا جائے۔ تاہم ختنہ نہ ہونے کے باوجود اس شخص سے نکاح کیا جاسکتا ہے۔ کوئی حرج نہیں ہے۔

(۵) سوال :کھانستے ہوئے میرے بلغم ریشے میں خون آ رہا ہے، کیا اس سے میرا وضو قائم رہے گا یا ٹوٹ جائے گا؟

جواب:صورتِ مسئولہ میں اگر بلغم کے ریشے  میں خون آرہا ہے، تو اگر خون بہت کم ہے اور تھوک کا رنگ سفید یا زردی مائل ہے تو وضو نہیں ٹوٹے گا، اور اگر خون زیادہ ہے یا برابر ہے اور رنگ سرخی مائل ہے تو وضو ٹوٹ جائے گا، یعنی جو چیز غالب ہوگی اس کا حکم لگے گا، اگر خون غالب ہوگا تو وضو ٹوٹ جائے گا اور اگر تھوک غالب ہوگا تو وضو نہیں ٹوٹے گا۔

(۲) سوال:مسواک کے 70 فائدے ہیں کیا یہ حدیث ہے کیا اسے حدیث کہہ کر بیان کیا جا سکتا ہے یا نہیں۔

جواب:مسواک کرنا سنت ہے۔ اس سے دانتوں کی صفائی ہوتی ہے اور خدا تعالی کی رضامندی کا باعث ہے۔ احادیث میں اس کی بیشمار فضیلتیں بیان کی گئی ہیں۔ حضرت عائشہ رضی اللہ تعالی عنہا کہتی ہیں کہ جو نماز مسواک کرکے پڑھی گئی وہ بغیر مسواک والی نماز سے ستر گنا (ثواب میں) بڑھی ہوتی ہے۔

البتہ جو ستر فائدے بیان کئے جاتے ہیں اس طریقے سے احادیث میں موجود نہیں ہے۔ اس لئے حدیث کہہ کر بیان کرنا درست نہ ہوگا۔ ہاں مسواک کے جو جسمانی، دنیوی یادینی فائدے ہیں وہ اپنی جگہ پر درست ہیں۔

(۳) سوال:آج کل اکثر گھروں میں بیت الخلا اور وضو خانہ ایک ساتھ بنے ہوتے ہیں۔ ایسے میں یہ سوال پیدا ہوتا ہے کہ:

(1) جب بیت الخلا سے فارغ ہو کر وہیں وضو کیا جائے، تو کیا بیت الخلا سے فارغ ہونے کی دعا اسی جگہ پر پڑھی جا سکتی ہے؟

(2) اگر دعا وہیں نہ پڑھی جائے اور وضو کے بعد باہر آ کر دعا پڑھنی ہو تو پہلے کون سی دعا پڑھنی چاہیے:

جواب:بیت الخلا کی دعا متصل استنجا اور غسل خانے (اٹیج باتھ روم) کی چار دیواری میں داخل ہونے سے پہلے پڑھنی چاہیے، اور اگر وضو کی جگہ مکمل طور پر صاف ستھری ہو اور قضائے حاجت کی جگہ سے اتنے فاصلے پر ہو کہ بدبو نہ آرہی ہو تو ایسی صورت میں قضائے حاجت سے فارغ ہونے کے بعد وہاں پہنچ کر بیت الخلا سے نکلنے کی دعاء اور وضو کی دعائیں پڑھنے کی گنجائش ہے، لیکن اگر بدبو آرہی ہو یا جگہ صاف نہ ہو تو زبان سے نہ پڑھیں بلکہ دل میں پڑھیں۔ ورنہ باہر نکل اسی ترتیب سے دعائیں پڑھ لیں۔

(۳) سوال:حالت حیض میں عورت کے لئے قرآنی وظائف پڑھنا کیسا ہے؟

جواب:واضح رہے کہ قرآنِ کریم کی جن آیات میں دعا کے معنی ہیں،ان کواوراد و ظائف کی نیت سے حیض کی حالت میں پڑھنا درست ہے،البتہ جن آیات میں دعاء کے معنی نہیں ان کو حیض کی حالت میں پڑھنا درست نہیں۔

(۳) سوال:حضرت میرا ایک سوال ہے کہ ہم نیٹ کی تیاری کر رہے ہیں اور جس ہاسٹل میں رہتے ہیں اس کے ٹوائلٹ کا رخ قبلہ کی جانب ہے تو اس ٹوائلٹ کا استعمال کرنا کیسا ہے؟

جواب:آپ دیگر مسلمان طلبہ کے ساتھ مل کر انتظامیہ سے گفتگو کرکے ’’بیت الخلاء‘‘ کا رخ درست کرانے کی کوشش کریں، جب تک کوشش کامیاب نہ ہو تب تک اگر کوئی دوسری جگہ استنجاء کے لیے میسر نہ آئے تو اسی ’’بیت الخلاء‘‘ میں قضائے حاجت کریں، البتہ بیٹھتے وقت تھورا مڑکر بیٹھنے کی کوشش کریں، اگر ۴۵/ درجہ دائیں یا بائیں مڑجائیں گے تو بالاتفاق کراہت ختم ہوجائے گی، اگر اتنا نہ مڑسکیں تو جتنا مڑسکیں اتنا ہی کافی ہے، بعض فقہاء نے تصریح کی ہے کہ استنجا کے وقت اگر معمولی انحراف ہو تب بھی کراہت ختم ہوجاتی ہے۔ ورنہ اگر ہاسٹل چینج کرنے میں سہولت ہو چینج کر لیں۔

(۴) سوال:میرے ایک رشتہ دار کو خون کی ضرورت تھی، میں نے اسے اپنے خون کی ایک بوتل دے دی، میں اس وقت وضو کی حالت میں تھا، سرنج سے خون نکالا گیا اور خون میرے جسم پر بالکل نہیں لگا، سوال یہ ہے کہ کیا اس صورت میں خون دینے سے میرا وضو ٹوٹ گیا؟

جواب:جی ہاں! خون دینے سے آپ کا وضو ٹوٹ گیا، کیونکہ بدن کے کسی حصہ سے خون نکل کر بہہ جانے کی صورت میں وضو ٹوٹ جاتا ہے، اگرچہ آپ کے جسم پر خون نہ لگے۔

(۲) سوال:اگر بندر سوئمنگ پل میں گرجائے یا نہالے تو پانی پاك رہتا ہے یا نہیں؟

جواب:سوئمنگ پل (حوضِ کبیر)  دہ در دہ ہے تو وہ اس وقت ناپاک ہوتا ہے جبکہ نجاست کی وجہ سے اس کے اوصاف ثلثہ (رنگ، بو ، مزہ) میں سے کوئی وصف بدل جائے اس لیے اگر اس حوض میں بندر گر جائے یا نہالے تو اس کی وجہ سے وہ حوض ناپاک نہ ہوگا اور اس حوض سے وضو کرنا درست ہوگا۔ وبتغیر أحد أوصافہ من لونٍ أوطعمٍ أو ریحٍ ینجس الکثیر ولو جاریاً إجماعاً․ (شامی: ۱/۳۳۲)

(۴) سوال:یا سلام كا ورد بغیر وضوء كے كر سكتے ہیں؟

جواب:كر سكتے ہیں۔

(۳) سوال:مفتی صاحب کیا حیض و نفاس کی حالت میں روزہ نماز دونوں معاف ہیں؟ یا انکی قضاء کرنی پڑے گی ؟

جواب:حیض و نفاس کی حالت میں نماز معاف ہے اس کی قضاء بھی نہیں کرنی ، البتہ روزے کی قضا کرنی پڑتی ہے۔

(۵) سوال:میرا بچہ دو مہینے کا ہے، وہ میرے کپڑے پر پیشاب کر دیتا ہے، تو کیا میں ناپاک ہوگیا؟

جواب:چھوٹے بچے یا بچی کا پیشاب اسی طرح نجس (ناپاک) ہے جس طرح بڑوں کا پیشاب نجس ہے، اگر کسی جگہ لگ جائے تو اسے پاک کرنا شرعًا ضروری ہوتا ہے۔ کپڑے یا جسم پر جس جگہ بچہ کا پیشاب لگے گا وہ جگہ ناپاک ہوجائے گی اور اسے پاک کرنا ضروری ہوگا۔

(۳) سوال:مسجد کے غسل خانوں میں مقامی آدمی کا غسل کرنا کیسا ہے۔ جب کہ ان کے گھروں کے اندر یہ سہولت موجود ہے؟

جواب:بہتر یہی ہے کہ یہ تمام ضروریات گھر سے ہی پوری کر کے آئیں البتہ جو لوگ مسجد میں نماز، تلاوتِ قرآن اور ذکر وعبادت کے لیے آئیں صرف ان کے لیے مسجد کے بیت الخلا اور غسل خانوں کا استعمال جائز ہے، باقی جو لوگ صرف استنجاء یا نہانے کے مقصد سے آتے ہیں ان کے لیے مسجد کے بیت الخلاء اور غسل خانوں کا استعمال شرعاً جائز نہیں ہے۔

(۴) سوال:استنجاء کے بعد ٹشو پیپر رکھ لیا اور بعد میں ٹشو پیپر ہٹانا بھول گیا اور وضوء کرکے نماز پڑھ لی۔ کیا نماز ہو جائیگی یا دوبارہ پڑھنی ہوگی؟

جواب:پیشاب کے قطروں سے حفاظت کے لیے ٹیشو پیپر کا استعمال کرنا درست ہے۔ اگر قطرہ نکلنے کا شبہ ہوا تو کھول کر دیکھنا ضروری ہوگا، دیکھنے کے بعد تسلی ہوگئی، اب پھر شبہ ہوا تو اب اسی میں نماز پڑھے جب تک نکلنے کا غالب گمان نہ ہوجائے۔ اور اس صورت میں اگر سوراخ کی جانب ٹیشو پیپر پر تری نظر نہیں آتی ہے، تو پاک سمجھا جائے گا، اور اسی میں نماز ہوجائے گی ۔

(۵) سوال:روزہ کی حالت میں جب ہم مسواک کرتے ہیں تو لعاب دہن مسواک کے مزاہ کو اور بڑھا دیتاہے، اگر ہم اسے نگل جائیں یا یہ از خود گلے کے اندر چلاجائے تو کیا اس سے روزہ ٹوٹ جائے گا؟

جواب:صورت مسئولہ میں روزہ نہ ٹوٹے گا ، ہاں اگر لعاب کی مقدار اتنی ہو کہ جس کو عموماً زیادہ کہا جاتا ہے تو ٹوٹ جائے گا۔

(۵) سوال:عورت کا ایام مخصوصہ میں ذکر و اذکار اور تلاوت کا کیا حکم ہے ؟

جواب:عورت کے لئے ایام مخصوصہ میں قرآن پاک کی تلاوت اور بلاحائل (بغیر کسی موٹے کپڑے وغیرہ کے ) اسے چھونا بھی جائز نہیں ہے۔ ہاں اس حالت میں عورت کے لیے ذکر واذکار کرناجائزہے،مثلاً درود پاک،استغفار، کلمہ طیبہ،یا کوئی اور وظیفہ پڑھنا یا قرآن مجید میں جو دعائیں آئی ہیں ان کو دعاء کی نیت سے پڑھنا درست ہے۔

(۱) سوال:جب مسواک گھس کر چھوٹی پڑ جائے تو اُسے کیا کرنا چاہئے؟

جواب:غیر مستعمل مسواک کو گندگی کی جگہ پر نہ ڈالا جائے بلکہ کسی محفوظ جگہ پر رکھ دیں، یاز مین یا کیاری میں دفن کر دیں۔

سوال:اگر كسی كے كپڑوں پر الگ الگ جگہ نجاست لگی ہو اور وہ مل كر ایك درہم كے بقدر ہوجائے تو اس كا كیا حكم ہے؟

جواب:نجاست کے مجموعے کا اعتبار ہوگا۔ لہذا اب اگر وہ نجاست درہم کے مقدار سے زائد ہے تو اس کا پاک کرنا فرض ہے، بغیر پاک کیے نماز پڑھ لی تو نہیں ہو گی۔ اور اگر ایک درہم کے برابر ہے تو پاک کرنا واجب ہے بغیر پاك کیے نماز مکروہ تحریمی واجب الاعادہ یعنی ایسی نماز کا لوٹانا واجب ہے۔

(۱) سوال:یہ جو ہیر ڈائی آج کل بازار میں ملتے ہیں جیسے گارنیر، گودریج وغیرہ۔ سوال یہ تھا کہ کیا ان کے لگانے سے غسل ہو جاتا ہے؟ کیا کوئی طریقہ ہے جس سے انہیں چیک کر سکے کہ یہ صرف بالوں کو کلر کرتے ہیں یا کوئی پرت، کو ٹنگ بالوں پر چڑھا دیتے ہیں؟

جواب:اس چیز پر لکھا ہوتا ہے وہیں پڑھ لیا جائے کہ واٹر پروف کو ٹنگ ہے یا نہیں اگر واٹر پروف کوٹنگ ہوگی تو غسل نہیں ہوگا ۔

سوال:اگر غسل کرنے کے بعد دانتوں میں کچھ پھنسا رہ جائے تو کیا غسل ہو جائے گا؟

جواب:غسل سے پہلے دانتوں میں پھنسی ہوئی چیز یاد آجائے اور اسے بآسانی نکالنا ممکن ہو تو نکال لینا چاہئے اور اگر نکالے بغیر ہی غسل کر لیا تو بھی غسل درست ہو جاتا ہے کیوں کہ دانتوں میں پھنسی ہوئی کھانے کی چیز نرم اور قلیل مقدار میں ہونے کی وجہ سے پانی پہونچنے سے مانع نہیں ہوتی ۔

(۵) سوال:دانت کو کور (Tooth Cap) لگانے سے غسل یا وضو ہو جاتا ہے یا نہیں؟

جواب:دانتوں پر کور وغیرہ اس طرح چڑھایا گیا ہو کہ وہ بالکل فکس ہوگیا ہوتو وہ دانت کے حکم میں ہوجائے گا اور اس حالت میں کلی کرنے سے غسل صحیح ہوجائے گااور وضو میں کلی کرنے کی سنت  بھی ادا ہوجائے گی۔

اور اگر کور کو دانت سے اتارکر دوبارہ چڑھایا جاسکتا ہو یعنی فکس نہ ہو، تو اس صورت میں واجب غسل کے لیے کور کو نکال کر کلی کرنا لازم ہوگا اور وضو میں بھی سنت پر عمل کرنے کے لیے کور اتارنا ضروری ہوگا۔