45 masail · Ramadan and the nafl fasts: what breaks a fast, what makes one up.
روزہ و رمضان
(۲) سوال:حضرت ہم نے سنا ہے کہ پورے سال میں ۵/ دن روزے نہیں رکھتے ہیں ۔ عید الفطر کا دن، تین بقرعید کے دن کے روزے۔ پانچواں دن کون سا ہے جس میں روزہ نہیں رکھتے ہیں ۔جواب سے نوازیں مہربانی ہوگی۔
جواب:سال میں پانچ دن روزہ رکھنا شرعاً منع ہے، ایک عید الفطر کا دن یعنی یکم شوال اورچار دن ذوالحجہ کے مہینے میں ہیں ، یعنی دس ذوالحجہ سے لے کر تیرہ ذوالحجہ تک لگاتار چار دن۔
(۱) سوال:صرف اکیلا دسویں محرم کا روزہ رکھنا مکروہ ہوتا ہے آج کے زمانہ میں بھی ؟
جواب:آج کل صرف دسویں محرم کا روزہ مکروہ تو نہیں ہے؛ البتہ دسویں کے ساتھ نویں یا گیارہویں کا بھی رکھ لینا بہتر ہے ۔
(۲) سوال:۔جوانسان روزہ نہیں رہتا یا انکا روزہ چھوٹ گیا ہو او روہ رہنا نہیں چاہتے ہو تو غریب کو ایک روزے کا کتنا پیسہ دے سکتے ہیں؟
جواب:جب آدمی بوڑھا ہوجائے اور روزہ رکھنے کی طاقت باقی نہ رہے تو روزہ کے بدلہ میں فدیہ دینے کی شرعی طور پر اجازت ہے۔(فتاوی قاسمیہ ج23/11)
اگر آئندہ صحت یابی کی کوئی امید نہیں ہے تو فدیہ دینے کی گنجائش ہے لیکن اگر کسی زمانہ میں صحت یاب ہوجائے تو روزہ کا کفارہ لازم ہوگا۔(فتاوی قاسمیہ ج525/11)
فدیہ کے مستحق وہ نادار فقیر ہیں جو مستحق زکوۃ ہیں۔(فتاوی قاسمیہ ج 524/11)
فدیہ میں روزانہ ایک صدقہ یا اسکی قیمت فقیر کو دینا ہے اور صدقہ فطر کی مقدار موجودہ اوزان کے حساب سے ڈیڑھ کلو ۴۷گرام ۰۴۶ملی گرام گیہوں ہے۔(فتاوی قاسمیہ ج525/11)
(۲) سوال:لیلة القدر کے لیے کوئی خاص قسم کی عبادت کرنا ؟
جواب:شب قدر کے اعمال کے بارے میں نوافل کی کسی خاص تعداد یا خاص طریقے یا نوافل کو جماعت کے ساتھ ادا کرنا شرعاً منقول نہیں ہے اور نہ ہی کوئی مخصوص طریقہ سے عبادت کرنا ثابت ہے۔ انفرادی طور پر جتنی عبادت یا نوافل ادا کیے جائیں، قرآن پاک کی تلاوت کی جائے اس کا بڑ ا اجر وثواب ہے۔
(۱) سوال:۔ رمضان میں صرف جمعہ جمعہ روزہ ركھنا؟
جواب:اگر کسی نے رمضان کے مہینے میں شرعی عذر (مرض یا سفر) کے بغیر روزہ رکھا ہی نہیں تو یہ اتنا بڑا گناہ ہے کہ ساری زندگی روزے رکھ کر بھی وہ ثواب حاصل نہیں کیا جاسکتا جو رمضان كے دنوں میں روزہ رکھنے کی صورت میں حاصل ہوتا (مشکاۃ المصابیح)۔ الا یہ كہ صرف جمعہ جمعہ كے روزے ركھے۔ البتہ اس صورت میں صرف ان روزوں کی قضا اور توبہ لازم ہوگی، کفارہ لازم نہیں ہوگا۔
(۲) سوال:روزے کی حالت میں خوشبو لگانا ، پرفیوم وغیرہ استعمال كرنا؟
جواب:روزے کی حالت میں عطر اور پرفیوم لگا سکتے ہیں، اس سے روزہ نہیں ٹوٹتا، بشرطیکہ پرفیوم لگاتے وقت اس کے ذرات حلق تک نہ پہنچیں۔
اسی طرح روزے کی حالت میں اگر بتی کا دھواں بغیر ارادہ کے خود بخود حلق میں داخل ہوجائے تو اس سے روزہ فاسد نہیں ہوتا، البتہ اگربتی جلا کر خود اس کےدھویں کو سونگھا، جس کی وجہ سے دھواں اندر چلا گیا تو اس سے روزہ فاسد ہوجائے گا۔ (فتاوی شامی کتاب الصوم، باب ما یفسد الصوم وما لا یفسدہ، 2/ 395/سعید)
(۳) سوال:۔ مفتی صاحب! کیا روزے کی حالت میں سوئمنگ پول میں نہانا صحیح ہے؟ اس سے روزے پر تو کوئی اثر نہیں پڑے گا؟
جواب:روزے کی حالت میں سوئمنگ پول یا نہر وغیرہ میں غوطہ لگانے سے روزہ نہیں ٹوٹتا، بشرطیکہ پانی منہ یا ناک کے راستے سے حلق سے نیچے نہ اترے، ورنہ روزہ ٹوٹ جائے گا اور قضا لازم ہوگی، لہذا جو شخص تیراکی اچھی طرح نہ جانتا ہو، اس کے لیے روزے کی حالت میں پانی میں غوطہ لگانا مناسب نہیں ہے، کیونکہ اس سے پانی حلق کے راستے اندر جانے کا اندیشہ ہوگا۔
(۴) سوال:۔ بیماری کی وجہ سے زندگی میں روزہ کا فدیہ اداکرنا؟
جواب:اگر کوئی شخص ایسا بوڑھا ہوگیا کہ روزہ رکھنے کی طاقت نہ رہی اور آئندہ بھی روزہ رکھنے کی طاقت ہونے کی امید نہیں ، یا ایسا بیمار ہوا کہ روزہ رکھنے کی طاقت نہ رہی اور آئندہ صحت یابی کی امید بھی نہیں ہے، تو ایسی حالت میں زندگی میں روزہ کا فدیہ دینا درست ہے۔ تاہم فدیہ ادا کرنے کے بعد اگر موت سے پہلے روزہ رکھنے کی طاقت حاصل ہو جائے اور وقت بھی ملے تو ان روزوں کی قضا کرنا ضروری ہوگا، فدیہ صدقۂ نافلہ سے تبدیل ہوجائے گا۔ اورایک روزے کا فدیہ ایک صدقۃ الفطر کے برابر یعنی پونے دو کلو گندم یا اس کی موجودہ قیمت ہے۔
(۶) سوال:۔ غلط فہمی کی وجہ سے غروبِ آفتاب سے پہلے افطار کرنے کا حکم؟
جواب:اگر روزہ دار غلط فہمی کی وجہ سے غروب آفتاب سے پہلے ہی افطار کرلے تو اس کا روزہ ٹوٹ جائے گا اور اس روزے کی قضا لازم ہوگی۔
(۷) سوال:۔ سحری كے وقت كھاتے كھاتے اذان ہونے لگی، تو كیا حكم ہے؟
جواب:سحری کا وقت صبح صادق تک ہوتا ہے اور صبح صادق کے ساتھ سحری کا وقت ختم ہوجاتا ہے اور فجر کا وقت شروع ہو جاتا ہے، اس لیے فجر کا وقت داخل ہوجانے کے بعد کھانا پینا جائز نہیں۔ فجر کا وقت چوں کہ صبح صادق کے بعد ہوتا ہے، اور فجر کی اذان صبح صادق کے بعد دی جاتی ہے؛ لہذا اذان شروع ہونے کے بعد روزہ دار کے لیے کھانا پینا جائز نہیں ہے، لهذا اگر کسی نے اس دوران کچھ کھا پی لیا تو اس کا روزہ نہ ہوگا، بعد میں اس روزے کی قضا کرنی ہوگی۔
(۸) سوال:۔ اعتكاف میں مسجد سے باہر جانا؟
جواب:رمضان کےمسنون اعتکاف کے لئے جمہور احناف کے نزدیک پورا وقت مسجد میں گزارنا ضروری ہے، سواۓ قضاۓ حاجات کے مسجد کی حدود سے باہر جانے کی اجازت نہیں ہے۔
(۱) سوال:۔ روزے میں بھول کر کھانے، پینے کا حکم؟
الجواب وباللہ التوفیق: روزے میں بھول کر کھانا، پینا معاف ہے؛ لہٰذا اگر کسی نے روزے میں بھول کر کھالیا یا پی لیا تو روزہ نہیں ٹوٹے گا ۔ (الدر المختار مع رد المحتار، کتاب الصوم، باب ما یفسد الصوم ومالا یفسدہ، ۳: ۳۶۵\- ۳۷۳، ط: مکتبة زکریا دیوبند)۔
(۲) سوال:كياانجیکشن لگوانے سے روزہ ٹوٹ جائے گا ؟
جواب:روزے کی حالت میں انجکشن لگوانا جائز ہے، خواہ رگ میں لگوایا جائے یا گوشت میں؛ کیوں کہ انجکشن کے ذریعہ جو دوا بدن میں پہنچائی جاتی ہے وہ اصلی راستوں (Opening)سے نہیں، بلکہ رگوں یا مسامات کے ذریعہ بدن میں جاتی ہے، جب کہ روزہ فاسد ہونے کے لیے ضروری ہے کہ بدن کے اصلی راستوں سے کوئی چیز معدے یا دماغ تک پہنچے اور انجکشن میں ایسا نہیں ہوتا، یہی حکم ڈرپ کا بھی ہے، یعنی روزے کی حالت میں ڈرپ لگانے سے روزہ فاسد نہیں ہوتا۔ (فتاوی رحیمیہ میں ہے: (7/264):
"دوا بذریعہ انجکشن رگوں میں پہنچنا مفسدِ صوم نہیں ہے،فسادِ صوم کے ليے مفطر کا جوف دماغ یا معدہ میں پہنچنا ضروری ہے اور وہ یہاں پایا نہیں جاتا ، إن العبرۃ للوصول إلی الجوف و الدماغ. دیکھیے سوراخِ ذکر میں دوا ٹپکانے سے روزہ فاسد نہیں ہوتا؛ اس لیے کہ گو د وا اندرونِ بدن گئی، لیکن مثانہ سے آگے (معدہ میں ) نہیں پہنچتی ۔" (عالمگیری ج ۱ ص ۲۰۴ الباب الرابع فیما یفسد وما لا یفسد)
(۳) سوال:۔ روزہ کی حالت میں غرارہ كرنا؟
جواب:روزہ کی حالت میں غرارہ سے منع کیا جاتا ہے مبادا حلق کے نیچے پانی چلا جائے اور روزہ فاسد ہوجائے اس لیے روزہ کی حالت میں غسل میں صرف کلی کرلینا ہی کافی ہے، غسل صحیح ہوجائے گا ۔
(۴) سوال:۔ بغیر سحری كھائے روزہ ركھنا؟
جواب:سحری کھانا سنت اور باعث اجر وثواب ہے؛ لیکن روزہ کی صحت اس پر موقوف نہیں ہے، اگر کوئی شخص کسی وجہ سے سحری میں اٹھ نہ سکے پھر بھی وہ نیت کرکے روزہ رکھ سکتا ہے اور رمضان کے روزے کی نیت نصف النہار شرعی (صبح صادق اور غروب آفتاب کا بالکل درمیانی وقت) تک کی جاسکتی ہے۔
ویستحب السحور․․ لما رواہ الجماعة إلا أبا داوٴد عن أنس قال قال رسول اللہ صلی اللہ علیہ وسلم تسحروا فإن فيالسحور برکة إلخ (شامي: ۳/۴۰۰، زکریا) فیصح صوم رمضان․․․ بنیة من اللیل إلی الضحوة الکبری: ۳/۳۳۸، ط: زکریا) ۔
(۵) سوال:۔ روزے کی حالت میں مسواک اور ٹوتھ پیسٹ کرنے کا حکم؟
جواب:رمضان ہو یا غیر رمضان، روزے کی حالت میں مسواک کرنا نہ صرف جائز، بلکہ سنت ہے اور ٹوتھ پیسٹ استعمال کرنا مکروہ ہے، پس اگر ٹوتھ پیسٹ کے اجزاء حلق میں چلے گئے، تو اس سے روزہ بھی ٹوٹ جائے گا۔
(۶) سوال:۔ روزے کی حالت میں نمک چکھنا؟
جواب:بلاضرورت کسی چیز کو چباکر یا چکھ کر تھوکنے سے روزہ مکروہ ہو تا ہے؛ لہذا نمک چکھنے سے روزے میں کراہت آئے گی اور اگر نمک حلق سے اتر گیا تو روزہ فاسد ہوگا۔فقط واللہ اعلم
(۸) سوال:۔ رمضان کے روزے کی نیت کب تک کر سکتے ہیں؟
جواب:واضح رہے کہ نیت دِل کے ارادے کا نام ہے اور رمضان کے مہینے میں روزے کی نیت کرنا ضروری ہے، دل میں ارادہ کر لینا بھی کافی ہے، بہرحال اس نیت کے استحضار کے لیے اگر زبان سے بھی نیت کر لیں تو بہتر ہے، نیز فقہاء نے لکھا ہے کہ رمضان کے مہینے میں رات ہی سے نیت کر لینا مستحب ہے اور اگر رات کو نیت نہ کر سکا یا بھول گیا تو نصفِ نہار شرعی سے پہلے پہلے روزے کی نیت کر سکتے ہیں۔نصفِ نہار شرعی سے مراد یہ ہے کہ اگر صبح صادق کے طلوع اور سورج کے غروب کے وقت کو دو حصوں میں تقسیم کیا جائے تو اس کے درمیانی نقطے کو نصفِ نہارِ شرعی کہتے ہیں، اس وقت سے پہلے رمضان کے روزے کی نیت کرنا ضروری ہے۔
فقہاء نے لکھا ہے کہ رمضان المبارک میں روزے کے ارادے سے سحری کرنا بھی نیت کے قائم مقام ہے۔
الدر المختار وحاشية ابن عابدين (رد المحتار) (2/ 377):
"(قوله: إلى الضحوة الكبرى) المراد بها نصف النهار الشرعي والنهار الشرعي من استطارة الضوء في أفق المشرق إلى غروب الشمس".فقط واللہ اعلم
(۹) سوال:۔ كیا مسافر كے لئے سفر میں روزہ ركھنا ضروری ہے؟
جواب:دونوں برابر ہے، یعنی اس وقت رکھنے یا بعد میں قضا کرنے دونوں کا اختیار آپ کو ہے، لیکن مذکورہ سہولتوں کی موجودگی میں رکھ لینا زیادہ بہتر معلوم ہوتا ہے کہ چھوڑدینے کی صورت میں بعد میں قضا کرنا دشوار بھی ہوتا ہے اور اگلے وقت کے لیے موٴخر ہوتا ہے۔
(۱۰) سوال:۔ کیا قے (الٹی) آنے سے روزہ ٹوٹ جاتاہے؟
جواب:آپ ہی آپ قے آنے سے روزہ نہیں ٹوٹتا، تھوڑی قے ہوئی ہو یا زیادہ۔ اور اگر اپنے اختیار سے قے کیا اور بھر منھ قے ہوئی تو روزہ ٹوٹ گیا۔ لہٰذا اگر پہلی صورت پیش آئی ہے تو روزہ نہیں ٹوٹا۔ اور اگر دوسری صورت پیش آئی ہے تو ایک روزہ کی قضا رکھ لیں۔ کفارہ واجب نہیں۔
(۱۱) سوال:۔ حالتِ جنابت میں سحری کی تو روزے کا حکم؟
جواب:اگر غسل کا وقت نہ ہو یا کوئی عذر ہو تو وضو یا کلی وغیرہ کرکے سحری کرلینی چاہیے، اس لیے کہ جنابت کی حالت میں سحری کرنا منع نہیں ہے، لہذاجس شخص پر غسل واجب ہو اور وہ صبح صاد ق سے پہلے غسل نہ کرسکے اور سحری کرکے روزہ رکھ لے تو اس کا روزہ درست ہے، ناپاک ہونے کی وجہ سے روزہ پر کوئی فرق نہیں پڑے گا۔ البتہ غسل میں اتنی تاخیر کرنا کہ فجر کی نماز قضا ہوجائے گناہ کا باعث ہے۔
(۱۲) سوال:۔ رمضان میں انہیلر کا استعمال روزہ کی حالت میں کرسکتے ہیں یا نہیں؟
جواب:نہیں کرسکتے، اس لیے کہ بحالت صوم اس کے استعمال سے روزہ ٹوٹ جائے گا۔
(۱۳) سوال:۔ افطار میں تاخیر؟
جواب:سورج غروب ہوتے ہی افطار جائز و درست ہوجاتا ہے، البتہ اگر احتیاطاً دو تین منٹ کی تاخیر کرلی جائے تو بہتر ہے، مزید تاخیر کرنے کی ضرورت نہیں کیونکہ افطار میں تعجیل مستحب ہے، کذا فی الدر (مع الرد کتاب الصوم باب ما یفسد الصوم وما لا یفسدہ: ۳/۴۰۰، ط: مکتبہ زکریا دیوبند)
سوال:کیا نفلی روزوں کے ساتھ مثلًا ذی القعدہ، شوال، محرم وغیرہ کے روزوں کے ساتھ رمضان کے قضا روزوں کی نیت کر سکتے ہیں؟
جواب:قضاء کی نیت کرینگے تو قضاء کا روزہ ادا ہوگا نفلی ثواب نہ ملے گا۔ نفلی و قضاء دونوں کی نیت کرنا درست نہیں ہے۔
(۲) سوال:حضرت میرا سوال ہے کہ ایام بیض کے روزے ہر ماہانہ چاند کے 13 -14- 15 رکھا جاتا ہے ذوالحجہ کے اندر ان ایام میں روزہ رکھنا حرام ہے تو پھر یہ روزہ کس طرح رکھا جائے گا؟
جواب:ذی الحجہ کے مہینے میں رسول اللہ صلی اللہ علیہ وسلم کا معمول ابتدائی نو دن روزے رکھنے کا معمول تھا، اسی طرح سے ہر مہینے میں تین روزے رکھنے کا بھی معمول تھا، ہر مہینے کی تیرہ، چودہ اور پندرہ تاریخوں کے روزے پر مداومت نہ تھی، مہینے کے کسی بھی تین دن روزے رکھ لیا کرتے تھے، نیز تیرہ ذی الحجہ ایام تشریق میں شامل ہے، جس میں رزوہ رکھنے سے صراحت کے ساتھ رسول اللہ صلی اللہ علیہ وسلم نے منع فرمایا ہے۔
ہر ماہ تین دن روزے کا اہتمام ایام بیض کے ساتھ خاص نہ تھا، کبھی ایام بیض میں رکھتے تھے اور کبھی کسی بھی دن، لہذا صورت مسئولہ میں اگر کسی کا ایام بیض کے روزوں کا معمول ہو تو وہ ذی الحجہ کے مہینے میں ایام تشریق کے علاوہ کسی بھی تین دنوں میں روزے رکھ کر فضیلت حاصل کر سکتا ہے۔
(۱) سوال :کیا ذی الحجہ کے مکمل دس روزے رکھنا ضروری ہیں یا ایک، دو روزے بھی رکھ سکتے ہیں؟
جواب:احادیثِ مبارکہ سے معلوم ہوتا ہے کہ ذوالحجہ کے ابتدائی ایام میں ہردن کا روزہ ایک سال کے روزوں کے برابر اجر رکھتا ہے، اور بطورِ خاص یومِ عرفہ (۹؍ ذوالحجہ)کے روزے کی یہ فضیلت بیان کی گئی ہے کہ اس دن کا روزہ ایک سال قبل اور ایک سال بعد کے گناہوں کا کفارہ ہے۔ ذوالحجہ کے شروع کے نو دن روزے رکھنے کی فضیلت ہے، مکمل نو روزے رکھنا ضروری نہیں ہے، مسلسل نو روزے بھی رکھ سکتے ہیں اور اس سے کم بھی رکھنا دررست ہے۔البتہ نو ذو الحجہ کے روزے کی فضیلت بہت زیادہ ہے؛ اس لیے اس کا اہتمام کرلینا چاہیے۔
(۲) سوال:ایامِ بیض کے روزوں کی اہمیت کیا ہے؟ ان روزوں کی زیادہ فضیلت ہے؟
جواب:ایامِ بیض (قمری مہینہ کی تیرہ، چودہ اور پندرہ تاریخ) کے روزے مستحب ہیں، ان کا رکھنا فضیلت کا باعث ہے، اور نہ رکھنے میں گناہ نہیں ہے، اگر کسی شخص کا مستقل یہ روزے رکھنے کا معمول ہے تو یہ انتہائی سعادت کی بات ہے، البتہ اگر کبھی اس سے یہ روزے رہ جائیں تو قضا یا گناہ نہیں ہوگا، نیز قمری مہینے کے کسی بھی حصے (اول، درمیان، آخر یا متفرق) میں تین روزے رکھ لینے سے حدیث شریف کے مطابق یہ فضیلت حاصل ہوجاتی ہے کہ جس شخص کا معمول (رمضان المبارک کے علاوہ) ہر مہینے تین روزے رکھنے کا ہو تو گویا اس نے ساری زندگی روزے رکھے۔
(۳) سوال:بوجہ دعوت ایام بیض کا روزہ ترک کرنا کیسا ہے؟
جواب:دعوت دینے والا اگر کوئی خاص آدمی ہے جس کی دعوت قبول کرنا اور کھانا ضروری ہو ورنہ ضرر کااندیشہ ہویا دل شکنی ہوسکتی ہومثلا کوئی قریبی رشتہ دار یادوست دعوت ہوتو اس جیسے مواقع میں دعوت کھالے اور روزہ نہ رکھے۔ورنہ روزہ رکھے۔ اور ایام بیض کے روزے صرف مستحب ہیں۔
(۳) سوال :رمضان المبارک میں اگر کوئی روزے نہ رکھے تو کیا فدیہ ہے قیمت بتا دیں؟
جواب:شریعت میں روزے کے بدلے فدیہ کی ادائیگی کی اجازت صرف اس شخص کو ہے جو اتنا بوڑھا ہو چکا ہو یا ایسا بیمار ہو کہ وہ روزہ نہ رکھ سکتا ہو اور مستقبل میں اس کے صحت یاب ہونے کی کوئی امید نہ ہو، ایسا شخص ہر روزہ کے بدلے پونے دو کلو گندم ( گیہوں ) یا اس کی قیمت کسی مستحق زکات شخص کو دے دے۔ تاہم ایسا شخص جو تندرست ہو اور روزہ رکھنے پر قادر ہو یا جس نے وقتی بیماری کی وجہ سے روزہ ترک کیا ہو، اور زندگی میں دوبارہ صحت مند ہونے کی امید ہو، اس کے لیے روزے کا فدیہ ادا کرنا جائز نہیں ، تندرست آدمی کے لیے روزے رکھنا فرض ہے، اور بیمار آدمی کے لیے صحت مل جانے کے بعد روزے کی قضا کرنا لازم ہے ۔
فدیہ ادا کرنے کے بعد اگر وہ شخص دوبارہ روزہ رکھنے پر قادر ہو گیا تو وہ فدیہ معتبر نہیں ، وہ صدقہ ہو گیا اور اب ان روزوں کی (جن کا پہلے فدیہ ادا کیا تھا ) قضاء کرنی لازم ہے۔
(۱) سوال :روزے میں ویکس انہیلر کے استعمال کا حکم کیا ہے؟
جواب:ویکس انہیلر جس کو محض سونگھنے کے لیے استعمال کیا جاتا ہے، اس سے روزہ نہیں ٹوٹتا ہے، اس لیے کہ اس میں محض خوشبو سونگھنا پایاجاتا ہےاور خوشبو سونگھنے سے روزہ فاسد نہیں ہوتا ۔
(۲) سوال :كيا روزہ کی حالت میں زخمی ہونے سے اگر خون نکلے تو اس سے روزہ ٹوٹ جاے گا؟
جواب:روزہ کے دوران جسم کے کسی بھی حصہ سے خون نکلے گا تو روزہ فاسد نہیں ہوگا البتہ وضو فاسد ہو جائے گا۔ لہذا آپ کا روزہ نہیں ٹوٹا ۔
(۱) سوال :اگر منہ بھر الٹی خود بخود ہو جائے تو کیا روزہ ٹوٹ جاتا ہے؟
جواب:خود بخود قے آنے سے چاہے منہ بھر کر ہو یا منہ بھر سے کم ہو روزہ علی حالہ برقرار رہے گا فاسد نہیں ہوگا۔
(۴) سوال :کیا روزے میں سر میں تیل لگا سکتے ہیں؟
جواب:روزے کی حالت میں سر پر تیل لگانا جائز ہے، اس سے روزے پر کوئی اثر نہیں پڑتا۔
(۷) سوال :کتنے سال کی عمر میں بچے کو روزہ رکھنا چاہئے؟
جواب:لڑکے اور لڑکی پر بالغ ہونے کے بعد روزہ رکھنا فرض ہوتا ہے، اگر بلوغت کی کوئی علامت نہ پائی جائے تو پندرہ سال کی عمر ہونے پر انہیں بالغ تسلیم کیا جائے گا اور روزہ رکھنا فرض ہوگا۔ تاہم بالغ ہونے سے پہلے بھی اگر بچے میں روزہ رکھنے کی طاقت ہو اور روزہ سے اس کو کوئی ضرر لاحق نہ ہوتا ہو تو اس کو روزہ رکھنے کا حکم دیا جائے، اور دس سال عمر ہونے پر تحمل وبرداشت کے موافق روزہ رکھنے کی تاکید کرنی چاہیے، تاکہ اس کی عادت بن جائے اور بالغ ہونے کے بعد اس کے لیے روزہ رکھنے میں دشواری نہ ہو، اور اگر نابالغ بچہ روزہ رکھ کر توڑ دے تو اس کی قضا رکھوانا لازم نہیں ہے۔
(۳) سوال :بحالت روزہ تھوڑی سی قے منہ میں آئی اور قصداً اسے نگل لیا توکیا روزہ فاسد ہوجائے گا؟
جواب:اگر روزے کی حالت میں تھوڑی سی قے (vomit) خودبخود منہ میں آگئی اور آپ نے جان بوجھ کر اسے نگل لیا تو اس سے روزہ فاسد ہو جائے گا، کیونکہ قے کو عمداً نگلنا ایسی چیز کو دوبارہ اندر لے جانے کے مترادف ہے جو باہر نکل چکی تھی، اور یہ روزے کو توڑنے کا سبب بنتا ہے۔ البتہ اگر قے خودبخود آئی اور غیر ارادی طور پر حلق سے نیچے چلی گئی، تو اس سے روزہ نہیں ٹوٹے گا۔ اگر روزہ فاسد ہو جائے تو اس دن کا روزہ قضا کرنا ضروری ہوگا، لیکن کفارہ لازم نہیں آئے گا۔
(۴) سوال :نفلی روزہ بغیر شرعی عذر کے توڑنے کا کفارہ کیا ہے؟
جواب:نفلی روزہ بغیر کسی عذر کے توڑنا ظاہرِ روایت کے مطابق درست نہیں ہے، اس لیے اس میں ایک عمل کو باطل کرنا ہے، ہاں کوئی عذر ہو تو توڑ دینے کی گنجائش ہے، بہر صورت عذر ہو یا نہ ہو نفلی روزہ توڑنے سے ایک روزہ کی قضا کرنا لازم ہوتا ہے، اس کے علاوہ نفلی روزہ توڑنے والے پر کفارہ لازم نہیں ہوتا۔
(۲) سوال :اگر ہم نے نفل روزہ رکھا اور وہ کسی وجہ سے ٹوٹ گیا تو کیا اس کی قضاء ہے؟ کیا وہ روزہ ہمیں بعد میں رکھنا پڑے گا؟
جواب:واضح رہے کہ نفل روزہ شروع کرنے سے لازم ہوجاتا ہے،لہذا بغیر کسی عذر کے توڑنا گناہ ہے ، البتہ اگر عذرہو توروزہ توڑنے کی گنجائش ہے۔نيز دونوں صورتوں میں یعنی عذر کی وجہ سے توڑا ہو یا بغیر عذر کے ، بہر صورت اس ایک روزہ کی قضاء لازم ہوگی کفارہ نہیں آئے گا۔
(۴) سوال:صرف اکیلا دسویں محرم کا روزہ رکھنا مکروہ ہوتا ہےکیا آج کے زمانہ میں بھی ؟
جواب:آج کل صرف دسویں محرم کا روزہ مکروہ تو نہیں ہے؛ البتہ دسویں کے ساتھ نویں یا گیارہویں کا بھی رکھ لینا بہتر ہے ۔
(۴) سوال:کیا شوال کے چھ روزے رکھنے کے لئے عید کے اگلے دن کا روزہ رکھنا ضروری ہے؟
جواب:پورے شوال کے مہینے میں چھ روزوں کی فضیلت وارد ہوئی ہے، یہ روزے عید کے دوسرے دن سے شروع کرنا لازمی نہیں ہے، بلکہ شوال کے مہینہ میں کبھی بھی رکھ سکتا ہے، چاہے لگاتار چھ روزے ایک ساتھ رکھے اور چاہے تو الگ الگ کر کے رکھے۔
(۱) سوال:کیا رمضان کے آخری عشرہ میں اعتکاف کرنا بہتر ہے یا تبلیغ جماعت میں جانا بہتر ہے؟اگر دونوں کو الگ سے کرنے کے لیے میرے پاس وقت نہ ہو تو کیا میں ان میں سے صرف ایک پر عمل کرسکتا ہوں؟
جواب:رمضان کے اخیر عشرہ میں اعتکاف کرنا سنت ہے اور تبلیغی جماعت میں جانا سنت نہیں، ایک مباح اور جائز کام ہے، ظاہر ہے کہ سنت کو ترجیح دی جائے گی، جماعت میں جانے کے لیے پورا سال پڑا ہوا ہے جب چاہیں جاسکتے ہیں۔ ہاں اگر جماعت میں ہوتے ہوئے اعتكاف كی كوئی شكل بن جائے تو نورٌ علي نورٌ۔
(۳) سوال:لیلة القدر كی رات عبادت كرنے پر ایك ہزار مہینوں كی عبادت كا ثواب ملتا ہے ایسا میں نے سنا ہے تو كیا اگر كوئی گناہ كرتا ہے تو ایك ہزار مہینوں كا ہی ملے گا؟
جواب:آپ نے ٹھیك سنا ہے۔ قرآن كریم میں اللہ تعالی كا ارشاد ہے (لَیلَةُ القَدرِ خَیرٌ مِّن اَلفِ شَہرٍ) مقام کے تقدس اور وقت کی عظمت وبابرکت ہونے کے اعتبار سے برائی کا گناہ اور اس کی قباحت بھی بڑھ جاتی ہے، تاہم برائی کے بارے میں ستر کی صراحت نظر سے نہیں گذری۔
(۴) سوال:دانت میں درد کی وجہ سے دوا كی كلی كرنے سے روزے كا حكم كیا ہوگا؟
جواب:نہیں ٹوٹے گا ، البتہ اگر دوا کا کوئی جز حلق میں چلا گیا تو روزہ ٹوٹ جائے گا، اس لیے بغیر سخت مجبوری کے روزہ کی حالت میں دوا كی كلی وغیرہ بھی نہ كی جائے۔
(۱) سوال:مفتی صاحب میرے دانت میں بہت ہے تو کیا میں روزہ توڑ سکتا ہوں؟
جواب:اگر ایسا درد ہو کہ روزہ نہ توڑنے کی وجہ سے بیماری بڑھنے کا یا تندرست ہونے میں تاخیر کا یا دانت ضائع ہوجانے کا خطرہ ہو تو روزہ توڑنا جائز ہے۔ صرف قضا لازم ہوگی، کفارہ نہیں۔ البتہ معمولی درد یا وہم کی بنا پر روزہ توڑنا جائز نہیں ہے اور توڑنے کی صورت میں قضا کے ساتھ کفارہ بھی لازم ہے۔
(۵) سوال:مفتی صاحب سحری میں آنکھ نہ کھلے تو صبح روزے کی نیت کس وقت تک کر سکتے ہیں؟
جواب:نیت دِل کے ارادے کا نام ہے اور رمضان کے مہینے میں روزے کی نیت کرنا ضروری ہے، دل میں ارادہ کر لینا بھی کافی ہے، بہرحال اس نیت کے استحضار کے لیے اگر زبان سے بھی نیت کر لیں تو بہتر ہے، نیز فقہاء نے لکھا ہے کہ رمضان کے مہینے میں رات ہی سے نیت کر لینا مستحب ہے اور اگر رات کو نیت نہ کر سکا یا بھول گیا تو نصفِ نہار شرعی سے پہلے پہلے روزے کی نیت کر سکتے ہیں۔نصفِ نہار شرعی سے مراد یہ ہے کہ اگر صبح صادق کے طلوع اور سورج کے غروب کے وقت کو دو حصوں میں تقسیم کیا جائے تو اس کے درمیانی نقطے کو نصفِ نہارِ شرعی کہتے ہیں، اس وقت سے پہلے رمضان کے روزے کی نیت کرنا ضروری ہے۔
فقہاء نے لکھا ہے کہ رمضان المبارک میں روزے کے ارادے سے سحری کرنا بھی نیت کے قائم مقام ہے۔ واللہ اعلم
(۶) سوال:مفتی صاحب! روزہ کن کن چیزوں باتوں سے ٹوٹ جاتا ہے؟ موٹی موٹی چیزیں بتادیں۔
جواب:روزہ بہت ساری چیزوں سے ٹوٹ جاتا ہے،ان میں سے چند چیزیں مندرجہ ذیل ہیں:
(1) کان اور ناک میں دوا ڈالنا۔
(2) قصداً منہ بھر قے کرنا۔
(3) کلی کرتے ہوئے حلق میں پانی چلا جانا۔
(4) عورت کو چھونے سے انزال ہوجانا۔
(5) کوئی ایسی چیز نگل جانا، جو عادۃً کھائی نہیں جاتی، جیسے لکڑی، لوہا، کچا گیہوں کا دانہ وغیرہ۔
(6) لوبان یا عود وغیرہ کا دھواں قصداً ناک یا حلق میں پہنچانا۔
(7) بھول کر کھا پی لیا اور یہ خیال کیا کہ اس سے روزہ ٹوٹ گیا ہوگا، پھر قصداً کھا پی لیا۔
(8) رات سمجھ کر صبح صادق کے بعد سحری کھالی۔
(9) دن باقی تھا، مگر غلطی سے یہ سمجھ کر کہ آفتاب غروب ہوگیا ہے، روزہ افطار کرلیا۔
ان سب چیزوں سے روزہ ٹوٹ جاتا ہے، مگر صرف قضا واجب ہوتی ہے، کفارہ لازم نہیں ہوتا۔
(10) جان بوجھ کر بیوی سے صحبت کرنے یا کھانے پینے سے روزہ ٹوٹ جاتا ہے، قضاء اور کفارہ دونوں لازم ھوتے ہیں۔
کفارہ یہ ہے کہ ایک غلام آزاد کرے، ورنہ ساٹھ روزے متواتر رکھے، بیچ میں ناغہ نہ ہو، ورنہ پھر شروع سے ساٹھ روزے پورے کرنے پڑیں گے اور اگر روزہ کی بھی طاقت نہ ہو تو ساٹھ مسکینوں کو دونوں وقت پیٹ بھرکر کھانا کھلاے۔ آج کل شرعی غلام یا باندی کہیں نہیں ملتے، اس لیے آخری دو صورتیں متعین ہیں۔
A general answer cannot account for every circumstance. If your case differs, send the details and ask directly.
Ask Mufti Arbab
