Belief

(۳) سوال:جس ملک میں رہو اس ملک سے محبت کرو۔ وطن سے محبت ایمان کا حصہ ہے۔ یومِ آزادی کے موقع پر لوگ ان جملوں کو احادیث بتا کر شیئر کرتے ہیں ۔ کیا یہ واقعی احادیث ہیں ۔ اگر ہیں تو احادیث کا نمبر بتا دیجئے۔

جواب:حب الوطن من الإیمان”یعنی وطن سے محبت ایمان کا جز ہے، اس قسم کی بات عوام الناس میں حدیثِ رسول صلی اللہ علیہ وسلم کے طور پر مشہور ہے، جب کہ مذکورہ الفاظ کی نسبت رسولِ اکرم صلی اللہ علیہ وسلم کی طرف کرنا درست نہیں ، اس لیے کہ محدثین نے اس روایت کو موضوع یعنی من گھڑت قرار دیا ہے،جیساکہ“موضوعات الصغانی”میں ہے

حبُّ الوطنِ منَ الإیمانِ. (موضوعات الصغانی.الصفحۃ أو الرقم: 53)

موضوع المقاصد الحسنۃ میں ہے: حبِّ الوطنِ منَ الإیمانِ۔ (المقاصد الحسنۃ للسخاوی، الصفحۃ أو الرقم: 218) قال السخاوی: لم أقف علیہ.

الدرر المنتثرۃ میں ہے: حبُّ الوطنِ من الإیمانِ. (الدرر المنتثرۃ للسیوطی، الصفحۃ أو الرقم: 65) قال السیوطی: لم أقف علیہ

الأسرار المرفوعۃ میں ہے: حبُّ الوطنِ مِنَ الإیمانِ. (الأسرار المرفوعۃ لملا علی القاری، الصفحۃ أو الرقم: 189)

قال علی القاری: قیل: لا أصل لہ أو بأصلہ موضوع

البتہ محدثین میں سے علامہ سخاوی رحمہ اللہ مذکورہ روایت کے معنی کو صحیح قرار دیتے ہوئے فرماتے ہیں کہ روایت اگرچہ صحیح نہیں ، لیکن اس کا معنی درست ہے

جب کہ دیگر محدثین نے علامہ سخاوی رحمہ اللہ کے اس قول کو قبول نہیں کیا اور ایمان اور وطن کی محبت کے تلازم کا انکار کیا ہے، اور ایمان کے جز ہونے کا انکار کیا ہے۔

پس مذکورہ بالا تفصیل سے ثابت ہوتا ہے کہ وطن کی محبت کو ایمان کا جز قرار دینا اور اس کی نسبت رسولِ اکرم صلی اللہ علیہ وسلم کی طرف کرنا صحیح نہیں ، البتہ بعض دیگر کچھ روایات سے وطن کی محبت کا ممدوح ہونا معلوم ہوتا ہے، تاہم ان روایات میں سے کسی سے بھی محبتِ وطن کا ایمان کا جز ہونا ثابت نہیں ہوتا۔

ہجرت کے موقعے پر مکہ کو مخاطب کرکے آپ علیہ السلام نے فرمایا کہ اے مکہ! تو کتنا پاکیزہ اور میرا محبوب شہر ہے، اگر میری قوم مجھے نہ نکالتی میں کہیں اور نہ رہتا۔

ہجرت کے بعد آپ علیہ السلام نے مدینہ منورہ کے لیے دعا فرمائی کہ اے اللہ! مدینہ کی محبت ہمارے دل میں مکہ کی محبت سے زیادہ فرمادے۔

امام بخاری رحمہ اللہ نے روایت نقل کی ہے کہ آپ علیہ السلام جب سفر سے واپسی پر مدینہ تشریف لاتے تو مدینہ کے راستے یا مکانات نظر آتے ہی آپ علیہ السلام اپنی سواری کو مدینہ کی محبت میں تیز کردیتے۔

حافظ ابن حجرؒ فرماتے ہیں کہ اس سے مدینہ کی فضیلت کے ساتھ ساتھ وطن کی محبت کے جواز اور اس کی طرف شوق کا بھی پتا چلتا ہے۔فقط واللہ اعلم

(۱) سوال:کیا فرماتے ہیں علماء کرام مسئلہ ذیل کے بارے میں کہ: کیا اللہ کے رسول صلی اللہ علیہ وسلم پر جادو کا اثر ہوا تھا؟ اگر ہاں ہے تو اس کا کیا ثبوت ہے؟ اور کیا آج بھی کوئی جادوگر ہے؟ جو ہم میں سے کسی پر جادو کرسکتا ہے؟ برائے مہربانی جواب سے نوازیں

جواب:صحیح روایات سے ثابت ہے کہ نبی اکرم صلی اللہ علیہ وسلم پر ایک یہودی شخص ”لبید بن الاعصم“ نے جادو کیا تھا، جس کی بنا پر ایک خاص ذاتی معاملہ میں آپ صلی اللہ علیہ وسلم کو پریشانی لاحق ہوئی تھی۔ اس جادو کے دفعیہ کے لئے اللہ تعالیٰ نے قرآن کریم کی دو سورتیں (سورہ فلق اور سورہ ناس) نازل فرمائیں، اور آپ صلی اللہ علیہ وسلم کی پریشانی دور ہوئی۔ لہذا جادو سے متاثر ہونا شان رسالت کے خلاف نہیں ہے یہ بھی ایک محض بیماری ہے جس سے کوئی بھی شخص متاثر ہوسکتا ہے۔ آج بھی ایسا ممکن ہے۔ (مستفاد: بخاری شریف 462/1  وغیرہ تفسیر ابن کثیر 589/6 زکریا)

(۴) سوال:عورتوں میں یہ بات مشہور ہے کہ کہ رات کے وقت جھاڑو دینے، ٹوٹی کنگھی استعمال کرنے، ٹوٹی یا بال پڑی ہوئی برتن استعمال کرنے، ٹوٹا ہوا آئینہ دیکھنے سے گھر میں غربت آتی ہے۔ براہ کرم، رہنمائی فرمائیں۔

جواب:یہ باتیں صرف مشہور ہیں کسی معتبر ومستند کتاب میں ان کی صراحت نہیں ہے؛ البتہ ٹوٹے ہوئے برتن کے استعمال کی (اس میں پانی وغیرہ پینے کی) حدیث میں ممانعت آئی ہے۔

(۱) سوال:کیا اس بات کی کوئی حقیقت ہے کہ اگر اپنے گھر میں کسی پالتو جانور کا انتقال ہو جائے تو وہ گھر والوں کی جان کا صدقہ بن جاتا ہے؟

جواب:ایسی کوئی بات ہمارے علم میں نہیں ہے کہ پالتو جانو را گر مر جائے تو وہ جان کا صدقہ بنے کسی حدیث یا آیت میں ایسی بات ہماری نظر سے نہیں گزری۔

(۲) سوال:قیامت کا دن کی مقدار کتنی ہوگی  50000  سال یا  1000 سال؟

جواب:قرآن میں دونوں مقدار مذکور ہیں،دونوں میں تطبیق کی یہ صورت ہے کہ افراد کے اعتبار سے یہ مقدار ہوگی کچھ لوگوں کو پچاس ہزار سال کے برابر لگے گا، تو کسی کو ہزار سال کے برابر۔

(۳)سوال:خالص ترین تانبے سے تیار جس پر طاقتور ترین روحانی الفاظ کنندہ ہیں۔ کڑے کو بازو میں پہننے سے ہر قسم کی بندش‘ کالاسفلی عمل‘ جادو‘ نظر بد‘جنات سے انسان محفوظ رہتا ہے۔ ایسا اس کے بارے میں کہا جاتا ہے۔ تو کیا اس کا پہننا جائز ہے؟

جواب:ہاتھ میں کڑا پہننے میں عورتوں کیساتھ مشابہت ہے نیز بعض غیر مسلموں کا بھی یہ شعار ہے؛ اس لیے مردوں کے لیے ہاتھ میں کڑا پہننا شرعا جائز نہیں ہے الا یہ کہ یہ کڑا علاج میں اس قدر مفید ہو کہ دیگر کوئی علاج اس درجے کا مفید نہ ہو نیز اس میں کندہ روحانی الفاظ میں خلاف شرع کوئی چیز نہ ہو، ورنہ بہ طور علاج بھی اسے پہنناجائز نہ ہوگا۔

(۳) سوال:یہ ہے کہ رات میں بلی کاروناکیساہے؟کہتے ہیں کہ رات میں بلی کارونااچھانہیں ہوتاہے؟

جواب:لوگوں کا یہ کہنا کہ رات میں بلی کا رونا اچھا نہیں یہ بے بنیاد بات ہے۔ (اغلاط العوام)

سوال:مفتی صاحب کیا عالم برزخ کے اندر کیا فوت ہوئی بیوی اپنے شوہر کو یاد کرتی اس سے محبت کرتی ہیں؟

جواب:مرحومین دنیا میں موجود اپنے رشتہ داروں کو یاد کرتے ہیں، لیکن انکا یاد کرنا دنیا سے تھوڑا مختلف ہے جیسے کہ حدیث شریف میں ہے کہ جب کسی کی موت ہوتی ہے، تو اسکے وہ رشتے دار جو اس سے پہلے مر چکے ہیں ، وہ اس سے اپنے زندہ رشتہ داروں کے بارے میں پوچھتے ہیں، اب اگر بیوی فوت ہو گئی ہے، تو وہ شوہر کے بارے میں حال احوال پوچھتی ہے، اسی طرح اس کا الٹا۔ تو اسطرح کا یاد کرنا حدیث سے ثابت ہے۔

(۵) سوال:ایمان سیکھنا کتنا لازم ہے؟

جواب:اللہ پر اس کی وحدانیت پر ایمان لانا، رسول اللہ صلی اللہ علیہ وسلم کی رسالت پر ایمان لانا، اللہ کی بھیجی ہوئی تمام آسمانی کتابوں پر ایمان لانا، اس کے بھیجے ہوئے تمام رسولوں اور نبیوں پر ایمان لانا، اللہ کے تمام فرشتوں پر ایمان لانا، تقدیر پر ایمان لانا، بھلا ہو یا برا سب اللہ ہی کی طرف سے ہے، مرنے کے بعد دوبارہ اٹھائے جانے پر ایمان لانا، اور نماز پڑھنا، زکوٰۃ دینا، روزہ رمضان رکھنا، حج کرنا۔ یہ سب موٹی موٹی بنیادی چیزیں ہیں جو فرض کا درجہ رکھتی ہیں۔ پھر ان کے مسائل سے واقفیت رکھنا جو واجب کا درجہ رکھتے ہیں۔ پھر ان کی تفصیلات کا علم حاصل کرنا یہ مستحب کا درجہ ہے۔

(۱) سوال:گھریلو جھگڑے کے دوران ایک خاتون نے یہ الفاظ کہے"اے خدا تو کہاں ہے تو کس چیز کا خدا ہے مجھے تو تو نظر نہیں آتا تو ہے بھی کہ نہیں"ان الفاظ سے خاتون کے ایمان اور نکاح پر کیا اثر پڑا؟

جواب:صورت مسئولہ میں اگر واقعتاً خاتون نے مذکورہ الفاظ کہے ہوں،تو یہ کفریہ الفاظ ہیں، لہذا خاتون پر لازم ہے کہ وہ اپنے ایمان اور نکاح کی تجدید کرے۔

(۱) سوال :کیا شب برأت کے دن نئے کپڑے پہننا درست ہے؟

جواب:نئے کپڑے پہننے کی کوئی روایت نظر سے نہیں گزری۔ البتہ بغیر کسی اہتمام کے فرض یا وجب وغیرہ سمجھے بغیر پہن لے تو کوئی حرج نہیں ہے، لیکن اہتمام کرنا صحیح نہیں ہے۔

(۳) سوال :بڑے لوگ کہتے ہیں کہ حاملہ عورت کو جمعرات کی رات کہیں جانا پڑے تو دیر رات بارہ بجے کے بعد گھر مت واپس ہو، اسی طرح چوراہا کراس کرنے کو منع کرتے ہیں؟ اس کا کیا حکم ہے؟

جواب:سوال میں مذکور طرزِ عمل محض توہم پرستی اور رسمِ بد کو شامل ہے جس سے مسلمانوں کو بہرحال احتراز لازم ہے، جبکہ حاملہ عورت بھی بوقتِ ضرورت کسی بھی دن اور وقت اپنے محرم کی معیت میں اور شرعی پردہ ملحوظ رکھتے ہوئے باہر نکل سکتی ہے اس میں شرعاً کوئی قباحت نہیں۔

(۳) سوال :نماز میں آنکھیں بند رکھنے سے کیا جنت میں حوریں اندھی ہو جائیں گی؟

جواب:یہ بات من گھڑت ہے،جسکی کوئی حقیقت نہیں ہے، البتہ نماز میں بلا وجہ آنکھیں بند رکھنا مکروہ ہے۔

(۱) سوال:ماہِ محرم کا چاند دیکھ کرسجدہ کرنا اور سجدہ میں 70 بار الحمد شریف پڑھنا کیسا ہے؟

جواب:محرم الحرام کے چاند سے متعلق مذکورہ عمل اور اس کی فضیلت من گھڑت ہے، اس کا قرآن وحدیث میں کوئی ثبوت نہیں ملتا۔یہ بدعت اور جہالت ہےجس کی شریعت میں کوئی جگہ نہیں۔

سوال:کیا اللہ کے علاوہ کسی اپنی محبوب چیز کی قسم کھائی جا سکتی ہے؟ اگر کھائی جا سکتی ہے تو کس حدیث سے ثابت ہے؟

جواب:بلاضرورت قسم کھانا پسندیدہ عمل نہیں ہے، اگر کوئی ضرورت یا مجبوری ہو، تو صرف اللہ تبارک وتعالیٰ کے نام کی ہی قسم اٹھانا جائز ہے، اللہ تعالیٰ کے علاوہ کسی بھی چیز کی قسم کھانا جائز نہیں ہے، اگرچہ وہ کتنی ہی محبوب چیز ہی کیوں نہ ہو، احادیثِ مبارکہ میں اللہ تعالیٰ کے علاوہ کسی کی قسم اٹھانے سے منع کیا گیا ہے، اگر کوئی شخص اللہ تعالیٰ کے علاوہ کسی کی قسم اٹھا لے تو وہ قسم درست ہی نہیں ہوتی اور ایسی قسم توڑنے کی صورت میں کوئی کفارہ بھی لازم نہیں ہوتا، تاہم اللہ تعالیٰ کے علاوہ کسی چیز کی قسم کھانے پر توبہ و استغفار کرنا چاہیے۔

سوال:کیا اللہ کے علاوہ کسی اپنی محبوب چیز کی قسم کھائی جا سکتی ہے؟ اگر کھائی جا سکتی ہے تو کس حدیث سے ثابت ہے؟

جواب:بلاضرورت قسم کھانا پسندیدہ عمل نہیں ہے، اگر کوئی ضرورت یا مجبوری ہو، تو صرف اللہ تبارک وتعالیٰ کے نام کی ہی قسم اٹھانا جائز ہے، اللہ تعالیٰ کے علاوہ کسی بھی چیز کی قسم کھانا جائز نہیں ہے، اگرچہ وہ کتنی ہی محبوب چیز ہی کیوں نہ ہو، احادیثِ مبارکہ میں اللہ تعالیٰ کے علاوہ کسی کی قسم اٹھانے سے منع کیا گیا ہے، اگر کوئی شخص اللہ تعالیٰ کے علاوہ کسی کی قسم اٹھا لے تو وہ قسم درست ہی نہیں ہوتی اور ایسی قسم توڑنے کی صورت میں کوئی کفارہ بھی لازم نہیں ہوتا، تاہم اللہ تعالیٰ کے علاوہ کسی چیز کی قسم کھانے پر توبہ و استغفار کرنا چاہیے۔

(۲) سوال:السلام علیکم ورحمۃ اللہ وبرکاتہ مفتی صاحب حضرت حسین رضی اللہ عنہ کے قاتل کا نام کیا تھا؟

جواب:حضرت حسین رضی اللہ عنہ کے بدن مبارک پر نیزے اور تلوار کے متعدد زخم آئے تھے لیکن آخر میں جس شقی و بدبخت نے سرِمبارک کو تن سے جدا کیا اس کا نام ’’سنان بن انس‘‘ تھا۔

سوال:لوگ پیر میں تعویذ پہن لیتے ہیں وہ صیح ہے یا غلط؟

جواب:جاننا چاہئے کہ اگر تعویذ اسمائے حسنی، ادعیہ ماثورہ وغیرہ پر مشتمل ہو اور اس کو نافع بالذات نہ سمجھا جائے بلکہ اس کو دوا کی طرح علاج تصور کیا جائے اور نظر مسبب الاسباب اللہ کی طرف ہو تو اس کو باندھ سکتے ہیں؛ البتہ اگر تعویذ کلمات شرکیہ کفریہ پر مشتمل ہو یا اس کو موثر بالذات تصور کیا جائے تو پھر تعویذ کا لٹکانا قطعاً جائز نہیں۔

صورت مسئولہ میں تعویذ میں لکھے ہوئے کلمات جب چمڑے یا کسی چیز میں اچھی طرح بند ہوں یعنی موم جامہ کئے ہوئے ہوں یا اچھی طرح کسی چیز میں چھپی ہوئی ہوں تو شدید ضرورت کے وقت اسے پاؤں وغیرہ پر باندھنے کی اجازت ہوگی، تاہم ضرورت پوری ہوتے ہی فورا اتار دیا جائے ۔

سوال:اگر عورت رات میں بغیر دوپٹہ کے سوئے اور اسی حالت میں فجر کی اذان تک سوتی رہے تو کیا اس کے سر پر شیطان پیشاب کردیتا ہے، اور ایسی عورت کو کل فرشتے جنت میں بھی جانے سے روک دیں گے، کہ اس کے سر سے بدبو آرہی ہوگی۔ کیا  یہ صحیح ہے؟

جواب:کافی تلاش کے باوجود یہ روایت ہمیں کتبِ احادیث میں نہیں مل سکی، لہذا جب تک کسی معتبر سند کے ساتھ یہ الفاظ بطورِ حدیث کے نہ مل جائیں، انہیں بیان کرنے سے احتراز کیا  جائے۔